.webp){kind=icon}
Ким Кардашијан ќе плати 1,26 милиони долари во врска со обвинувањата од Комисијата за хартии од вредност (Securities and Exchange Commission - SEC) дека ги прекршила американските правила со рекламирање на крипто-токен без да нагласи дека станува збор за платена промоција.
SEC соопшти дека на Кардашијан ѝ биле исплатени 250.000 долари за објава на нејзиниот инстаграм профил поврзана со токените EMAX, крипто средство од EthereumMax. Кардашијан не ги призна, ниту пак негираше наводите од регулаторот во врска со овој случај.
SEC честопати предупредува дека познатите личности кои промовираат криптовалути треба јасно да прецизираат дали им се плаќа за таквата поддршка. Во 2018 година, регулаторот ги казни боксерот Флојд Мејведер и музичкиот продуцент диџеј Калед затоа што не објавија дека добиле надомест за промоција на токени.
„Овој случај е потсетник дека кога познати личности или инфлуенсери поддржуваат можности за инвестирање, вклучително и во крипто-средства, тоа не значи дека тие инвестициски производи се соодветни за сите“, рече претседателот на SEC, Гери Генслер во понеделникот. „Им посочуваме на инвеститорите да ги земат предвид потенцијалните ризици и можности од одредена инвестиција, водени од нивните сопствени финансиски цели“, додаде тој.
Главниот регулатор на Волстрит долго време тврди дека многу виртуелни токени се хартии од вредност и се под негова јурисдикција. За да утврди дали некое средство е хартија од вредност, SEC применува правен тест, кој води потекло од одлука на Врховниот суд од 1946 година. Според таа рамка, средството може да биде под надлежност на SEC кога вклучува инвеститори кои даваат пари со намера да профитираат преку напорите на раководството на одредена организација.
