Розов дијамант е продаден за 49,9 милиони долари во петокот во Хонгконг, поставувајќи светски рекорд за највисока цена по карат за дијамант продаден на аукција.
Дијамантот од 11,15 карати „Вилијамсон пинк стар“ (Williamson Pink Star), ставен на аукција од „Сотебис“ (Sotheby’s) во Хонгконг, продаден е за 392 милиони хонконгшки долари (49,9 милиони американски). Првично, неговата вредност се проценуваше на 21 милион американски долари.
Името на скапоцениот камен потекнува од два легендарни розови дијаманта. Првиот е дијамантот „Вилијамсон“ од 23,60 карати, кој ѝ беше подарен на покојната кралица Елизабета Втора како свадбен подарок во 1947 година, додека вториот е дијамантот „Розова ѕвезда“ (Pink star) од 59,60 карати кој беше продаден за рекордни 71,2 милиони долари на аукција во 2017 година.
„Вилијамсон пинк стар“ е вториот по големина розов дијамант што се појави на аукција. Розовите дијаманти се меѓу најретките и највредните од обоените дијаманти.
„Ова е неверојатен резултат, кој ја докажува издржливоста на врвните дијаманти во нестабилна економија“, рече Тобиас Корминд, управен директор на 77 Diamonds.
„Тврдите средства како што се дијамантите од светска класа имаат историја на добри перформанси дури и во време на нестабилност. Некои од најквалитетните дијаманти во светот забележаа двојно зголемување на цените во последните 10 години“, додаде тој.
.webp){kind=icon}
