И Бразил падна, Хрватска во полуфинале, а ХФС трие раце

Со победата над Бразил, Хрватска го продолжи походот во борбата за медали на Светското првенство во Катар. Хрватскиот фудбалски сојуз (ХНС) заработи вртоглави 25,2 милиони евра  со пласманот на фудбалската репрезентација во четвртфиналето на Светското фудбалско првенство во Катар.

ФИФА, според официјалните податоци на таа организација, ќе плати вкупно нешто помалку од една милијарда евра на националните асоцијации и клубови како награди за пласман на Светското првенство и како компензација на клубовите за учеството на нивните играчи во Катар. Ќе одвои и околу 200 милиони евра за обештетување на клубовите чии играчи ќе настапат на Светското првенство во Катар.

Наградата за репрезентацијата што ќе ја освои титулата светски првак ќе изнесува 40 милиони евра, а на таа сума се додаваат и 1,4 милиони евра кои секоја репрезентација ги добива за подготовки, покрај веќе споменатите 8,6 милиони евра за учество во групната фаза. Така светскиот шампион ќе добие вкупно 50 милиони евра.

„Ватрените“ по трет пат стигнаа до полуфинале, а ХНС ќе има уште најмалку 7,5 милиони евра на сметка, доколку Хрватска биде поразена во полуфиналето и мечот за третото место, односно ако го освои четвртото место.

Ако Хрватска ја освои бронзата, ХНС би заработила 35 милиони евра, ако освои сребро 39 милиони евра, а ако стане светски првак, тогаш здружението би заработило вкупно 50 милиони евра.