.webp){kind=icon}
Хебрејска библија стара 1.100 години е продадена за 38,1 милиони долари во „Сотби“ (Sotheby’s) во Њујорк.
Книгата Кодекс Сасун (Codex Sassoon), за која аукциската куќа вели дека е најстариот речиси сосема комплетен примерок во светот, е купена од „Американ френдс оф АНУ“ (American Friends of ANU) - Музејот на еврејскиот народ во Тел Авив, како подарок за музејот. Средствата за набавката се обезбедени од донација од Алфред Мозес, адвокат и дипломат, и семејството Мозес.
Зборувајќи по телефон веднаш по продажбата, Мозес кажа дека решил да учествува на аукцијата за Кодекс, а пред околу три недели ставил неотповиклива понуда од 32,5 милиони долари, што значи дека се договорил со аукциската куќа да ја купи библијата за таа сума; ако цената потоа ја надмине таа сума, Мозес ќе добие однапред договорено намалување на вкупната сума.
Дали верувал дека ќе биде победничкиот понудувач? Накратко, тој вели не. „Мислев дека ќе оди за многу повеќе - високи 40, ниски 50.
Фактот што успеал да ја купи, продолжува тој, „е голема возбуда, да можеш да му ја подариш најстарата постојна хебрејска библија на еврејскиот народ, да ја зачуваш за еврејскиот народ, да биде јавно изложена засекогаш“.
Библијата ја продаде инвеститорот Жаки Сафра.
Според информациите, во однос на продажбата на библијата се создало големо исчекување, внатре и надвор од аукциската куќа, за тоа кој би можел да стане крајниот купувач. „Сотби“ дури организира и турнеја за библијата, носејќи ја во Лондон, повеќе американски градови и Тел Авив, каде што беше прикажана на АНУ во март. Според аукциската куќа, ја виделе повеќе од 20.000 луѓе.
„Имаше огромен метеж“, вели Шерон Минц, експертка за книги и ракописи во „Сотби“, говорејќи пред продажбата. Кога пристигна во Тел Авив, „имаше редови пред вратата и околу блокот“, раскажува таа. „Луѓето се трогнати - тоа е чувство на радост. Тие се поврзуваа со овој ракопис само со тоа што се во иста просторија. Беше неверојатно“.
„Потенцијалните понудувачи од целиот свет, и приватни колекционери и јавни институции, се обратија до аукциската куќа“, вели таа. „Само написите во весниците доведоа до тоа да ни се јават потенцијални понудувачи. Тие прочитале за книгата и дојдоа да ја видат“.
Кодекс Сасун, именуван по некогашниот сопственик Дејвид Соломон Сасун (1880 - 1942), колекционер и член на моќното семејство Сасун, ги содржи сите 24 книги од хебрејската библија и недостигаат само неколку страници од Битието. Се смета дека потекнува од Израел или Сирија и опфаќа 396 пергаментни страници.
