Денес не е доволно да се понудат само врвен квалитет на услуга и луксузни содржини, бидејќи тоа е веќе очекуван стандард на пазарот. Неопходно е да се препознае дека секој гостин има свои уникатни потреби, желби и преференции, како и дека сака да го искористи своето драгоцено време на најдобар можен начин. Затоа луксузните објекти и брендови им посветуваат големо внимание на деталите и развиваат личен однос со гостите за да ги дознаат и да ги исполнат нивните индивидуални потреби на најдобар можен начин. Во светот со брз ритам, воден од дигиталната технологија, човечката топлина станува нова димензија на врвен луксуз. Затоа, суптилниот фактор што го одвојува автентичниот концепт од исклучителниот често се крие во душата, знаењето и карактерот на сопственикот, кој својата работа ја доживува како еден вид мисија, нудејќи им автентичност, топлина и внимание на корисниците за да им се овозможи чувство на припадност и почит.
Едно од таквите места е „Шале Софија“ (Chalet Sofija), новата ѕвезда на словенечката туристичка понуда. Сместен во идиличниот Гозд Мартуљек во Словенија, „Шале Софија“ нуди неповторлива комбинација на недопрена природа, врвен луксуз и внимателно осмислени услуги, кои ја надминуваат секоја категоризација. Неговата извонредна локација нуди импресивен поглед на Јулиски Алпи, создавајќи посебно искуство во регионот Горењска. Со само пет луксузни апартмани, со површина од 50 до 90 квадратни метри, овој уникатен концепт е резултат на четириесетгодишното искуство и стручност на сопственикот Светозар Распоповиќ Поп. Експерт за сѐ што ја претставува поубавата страна на живеењето, храната и виното, со извонреден осет за уредување ентериер и рафинирани работи што го прават животот поубав, Распоповиќ изгради место за одмор во кое гостинот знае дека неговото време се почитува.
Bloomberg Adria Luxury
Пријателската и опуштена атмосфера, панорамскиот поглед и уживањето во музиката го комплетираат кулинарското искуство, кое ќе ги задоволи и најпребирливите гурмани. Изборот на висококвалитетни состојки, внимателно осмисленото мени за сите оброци и широката палета на врвни вина и шампањ, со стручна препорака од сомелие, се приоритет на основачот, кој сам се грижи за сите детали.
Bloomberg Adria Luxury
Покрај удобното сместување во пет различни апартмани, кои се именувани по внуците на сопственикот, отворениот базен и спа-центарот, гостите можат да уживаат на терасите или, пак, во удобниот и пријатен ентериер, каде што секое парче мебел е од брендот „Рош Бобоа“, внимателно избрано и дополнето со дела на словенечки и интернационални уметници. Цените за дневно изнајмување апартман, во што се вклучени сите трошоци, користење на сите погодности на спа-центарот, како и појадок и комплетна вечера со избор на вино, започнуваат од 1.050 евра (www.chaletsofija.com).
Дека угостителските концепти повеќе не можат да си дозволат да бидат безлични примери на луксуз, туку мора да имаат и приказна, доказ е и следниот пример.
По завршувањето на кариерата како голман на англискиот клуб Чарлтон, кој со својот уникатен стил на одбрана успеа да го однесе овој клуб во првата лига, Саша Илиќ реши да го оствари својот сон и да создаде нешто уникатно. Инспириран од убавината на заливот Бока Которска, тој изградил луксузно одморалиште на местото на трошна куќа во Пераст, чија локација нуди прекрасен поглед на заливот и околните планини.
Bloomberg Adria Luxury
Илиќ посвети многу време на проучување на архитектонските стилови и современите трендови за да создаде уникатно место за одмор, но сепак во согласност со прописите што налагаат надворешниот изглед на објектот да не се менува, бидејќи Пераст е дел од природното и културно историско подрачје на Котор, заведено во списокот на светско наследство на УНЕСКО. Во соработка со реномирани архитекти и експерти, тој ја разви визијата за „Монте беј ретрит“ (Monte Bay Retreat) - бутик хотел со само шест апартмани со симболични имиња, кои сега се симбол на луксузот и софистицираноста во Црна Гора. Комбинирајќи ги традиционалните елементи на крајбрежната архитектура со модерен дизајн, тој создаде уникатна естетика што ги маѓепсува посетителите.
Bloomberg Adria Luxury
Неговата посветеност на деталите, срдечноста и љубезноста спрема гостите станаа заштитен знак на „Монте беј ретрит“ за посетителите од целиот свет. Секогаш подготвен да раскаже и понекоја анегдота од спортските денови, Илиќ вели дека навистина ужива во тоа што го работи и дека тоа не го доживува како работа: „Секогаш им помагам на моите гости максимално да го искористат својот престој така што им давам персонализирани препораки за активности и други доживувања. Некои и јас лично ги организирам со нив. Тоа покажува дека водите сметка за нивните интереси и дека сте посветени на тоа да им помогнете да го имаат најдоброто можно искуство. Гостите обично ги пречекувам со локален пијалак, ракија, а се збогуваме со срдечна прегратка. Гостите брзо се чувствуваат како дома, знаејќи дека ова е хотел „само за возрасни“ (Adult Only) и дека нема пристап доколку не сте гостин. Нашите гости се претежно парови, луѓе што сакаат да избегаат од реалноста и кои уживаат во интимен амбиент, каде што целото внимание им е посветено ним“, вели Саша. Цената на дневно изнајмување апартман е околу 250 евра (www.montebayretreat.com).
Bloomberg Adria Luxury
Со слична логика и грижа за своите клиенти се водела и Александра Дојчиновиќ, која својата долгогодишна љубов кон венчаниците неодамна ја претвори во „Ле концепт“ (Le Concept), мултифункционален простор што е веднаш до нејзиниот бутик за венчаници во загрепска Илица, а чиј ентериер е дизајниран од Анте Врбан, додека ѕидовите се украсени со уметнички дела на современи хрватски сликари од галеријата „Либар“.
Bloomberg Adria Luxury
Мултимедијалниот простор настанал од идејата на едно место да се понуди сѐ што им е потребно на дамите за најважниот, но, според многумина, и најстресен ден во нивниот живот. Затоа „Ле концепт“, објаснува Дојчиновиќ, е место за целосно персонализирано шопинг-искуство, што значи дека секоја идна невеста има цел простор само за себе, не само за избор на венчаница туку и за сите придружни услуги, а такви има многу.
Bloomberg Adria Luxury
„Пред да отвориме, веќе имавме значителен број резервирани термини за проби, а верувам дека ќе има неспоредливо повеќе кога ќе видат сѐ што имаме подготвено, од услуги на стилисти, советници, конструктори и цела низа други експерти што соработуваат на проектот. Тука се и чевлите, специјализираната долна облека, очилата, но и магичните модни додатоци, во кои, покрај шеширите, шнолите, веловите, ракавиците и украсите, доминира уникатниот накит и сето тоа со чаша од омилениот пијалак, бидејќи во салонот имаме дури и бар, за клиентите да се чувствуваат опуштено и удобно во секој миг“, открива Александра. Посебно внимание им е посветено на осветлувањето и огледалата, кои на и онака пространиот простор му даваат дополнителна длабочина и раскош, а на идните невести совршена заднина за прецизен увид во стилот за денот од соништата. Цената за еден час изнајмување е 25 евра (www.leconceptbyalex.com).
Доколку имате предлог, прашање или коментар, пишете ни на luxury@bloombergadria.com
.webp){kind=icon}
Во моментов нема коментари за веста. Биди прв да коментира...