Џеф Безос додаде нова вила на Јужна Флорида кон својата империја на недвижности, неколку месеци откако ја купи куќата до неа.
Основачот на „Амазон“ (Amazon.com) и трета најбогата личност во светот се согласил да плати 79 милиони долари за вилата со седум спални соби во Индијан Крик, вештачки остров во областа Мајами, тврдат упатени извори. Тоа е попуст од 7,1 отсто од нејзината котација во мај од 85 милиони долари.
Претставник на Безос не беше веднаш отворен за коментар. Продажбата ја водеа Дина Голдентаер и Данило Таварес со Даглас Елиман, но и двајцата одбија да коментираат.
Безос ја купи соседната куќа во јуни за 68 милиони долари. Со најновата аквизиција, тој ќе добие имот од околу 0,7 хектари изграден во 2000 година. Куќата последен пат беше продадена за 28 милиони долари во 2014 година.
Безос (59) сепак може да направи и други купувања во областа, според лице запознаено со ова прашање, кое побара да не биде идентификувано бидејќи станува збор за приватни информации. Индијан Крик, кој се наоѓа во заливот Бискејн и на околу 13 километри од Саут Бич, е познат како „Бункер на милијардерите“, бидејќи им е дом на инвеститорот Карл Ајкан, рагби-ѕвездата Том Брејди и пејачот Хулио Иглезијас, како и Џаред Кушнер и Иванка Трамп.
Покрај домовите во Индијан Крик, Безос има куќи во Вашингтон, вила во Беверли Хилс што ја купи за 165 милиони долари во 2020 година и имот во Мауи. Неговите луксузни трошоци се зголемија откако тој се повлече од функцијата главен извршен директор на „Амазон“ во 2021 година и откако се раздели од Мекензи Скот. Безос е сопственик на една од најскапите суперјахти во светот, „Кору“, која беше претставена оваа година, а нејзината изградба чинеше околу 500 милиони долари.
Неговиот најнов имот во Индијан Крик се протега на околу 1.770 квадратни метри, според огласите. Тој вклучува базен, кино, библиотека и винска визба и е дизајниран во стилот на „безвременскиот европски гламур“.
Безос има богатство од речиси 156 милијарди долари, според индексот на милијардери на „Блумберг“, што го прави еден од најбогатите сопственици на куќи во државата. Индијан Крик има околу 40 резиденции, кантри-клуб и сопствен полициски оддел.
.webp){kind=icon}
Во моментов нема коментари за веста. Биди прв да коментира...