Бавниот декемвриски ритам во кината не важи за Бијонсе и нејзиниот „Ренесанс“

Концертниот филм на Бијонсе, „Ренесанс“: Филм со потпис на Бијонсе“ (Renaissance: The Beyoncé Signature Movie) е на прво место со остварени 21 милион долари од продадени билети само во Северна Америка, според процените на „АМЦ тиатерс“ (AMC Theaters), пренесува „Асошиејтед прес“ (Associated Press).

Вообичаениот побавен ритам кога станува збор за заработката во киносалите пред Божиќ и по Денот на благодарноста во САД не важи за „Ренесанс“. Ова е првпат во последните 20 години, некој филм да отвори со над 20 милиони долари во првиот викенд од емитувањето. Всушност, тоа му се случи на „Последниот самурај“.

Бијонсе го напиша, режираше и продуцираше „Ренесанс“, кој се фокусира на турнејата за нејзиниот албум награден со „греми“. Дебитираше во 2.539 кина во САД и Канада, како и во 94 други земји, каде што заработи 6,4 милиони долари од 2.621 кино.

Иако „Ренесанс“ ни одблиску не ги достигна тие 92,8 милиони долари, колку што на отворањето заработи филмот на Тејлор Свифт - Тhe Eras Tour (од англиски и се однесува на актуелната турнеја која ги обединува сите нејзини ери) во октомври, сепак и оваа сума е одлична кога станува збор за почетокот на емитувањето и особено за концертен филм. Не се очекуваше дека „Ренесанс“ ќе стигне до филмот на Свифт, кој веќе е при крај од емитувањата во киносалите и веќе има заработка од 250 милиони долари низ светот. Пред Свифт, врвните концертни филмови (на Мајли Сајрус и Џастин Бибер за нивните филмови од 2008 и 2011 година, соодветно) не надминаа вкупно 32 милиони долари.

Турнејата „Ренесанс“ од 39 града и 56 претстави, која започна во Стокхолм, Шведска, во мај и заврши во Канзас Сити, Мисури, заработи над 500 милиони долари и ја видоа повеќе од 2,7 милиони посетители. Тековната турнеја на Свифт „Ерата на турнеите“ се очекува да заработи околу 1,4 милијарда долари.

И Бијонсе и Свифт избраа да работат со „АМЦ тиатерс“ (AMC Theaters) за дистрибуција на нивните филмови, наместо со традиционални студија. Двете суперѕвезди се поддржуваа една со друга, спектакуларно појавувајќи се една кај друга на премиерите , а Свифт се појави и на лондонската премиера на филмот на Бијонсе и на својот инстаграм-профил напиша: „Кралицата ме покани во Лондон“.

И двете претходно објавија филмови на Нетфликс („Miss Americana“ и „Homecoming“). И двете, наводно, добиваат најмалку 50 отсто од продажбата на билети.

И можеби најважното за поп-културата, и двете, покрај Барби, се носителки на актуелниот феномен наречен „женски долар“, кој се однесува на огромното влијание и придонес кон сè позначајната и доминантна улога на жената во светската економија.

Билетите за „Ренесанс“ беа поскапи од просечната цена, или околу 23,32 долари наспроти 20,78 долари за филмот на Свифт, пишува „Eнтелиџенс“ (EntTelligence).

Критичарите и публиката се воодушевени од „Ренесанс“. Филмот има 100 отсто оценка на „Ротен томатос“ (Rotten Tomatoes) и доби одлична оценка А+ од публиката за време на првиот викенд на прикажување.

Извор: Асошиејтед прес