Неодамна пронајдениот часовник на Џон Ленон вреди милиони

Часовникот од брендот „Патек Филип“ (Patek Philippe) што Јоко Оно му го подарила на својот сопруг Џон Ленон непосредно пред неговото убиство во 1980 година беше пронајден годинава во Женева, по години лутање низ Европа, и беше предмет на две аукции. Кога беше откриен, часовникот беше во сопственост на адвокат на италијански колекционер, кој го купил на аукција во Германија од сега непостојна куќа. Се верува дека часовникот го украл поранешен возач на Јоко Оно.

Прочитајте повеќе: Пронајден часовник од Џон Ленон по кој долго се трагаше, вреди милиони

Моделот „патек филип 2499 перпетуал календар хронограф“ (Patek Philippe 2499 perpetual calendar chronograph) долго време се сметаше за свет грал меѓу колекционерите и еден од највредните примероци во светот. Според документите, Јоко Оно во 2014 година контактирала со компанијата во Женева за да се утврди процената на часовникот, кој италијанскиот колекционер го купил за 600.000 швајцарски франци. Тој потег предизвика правна битка бидејќи Оно тврдеше дека има право на сопственост над часовникот. Адвокатите на колекционерот се повикуваа на фактот дека кражбата не била пријавена навреме, како што бара законот на државата Њујорк.

Во јуни 2023 година женевскиот суд пресуди во корист на Јоко Оно, утврдувајќи дека часовникот е украден и дека колекционерот не можел законски да го стекне на аукција. Пред неколку дена пресудата беше конечно потврдена откако беше отфрлена жалбата на колекционерот. Швајцарскиот федерален суд заклучи дека нема докази дека Јоко Оно имала намера да му подари на возачот толку посебен предмет. Според процените на адвокатите, вредноста на часовникот достигнува 4 милиони франци (околу 4,5 милиони долари), но експертите сметаат дека неговата историска и културна вредност може значително да ја зголеми цената и до четири пати повеќе од проценетата и така да достигне рекорд, кој засега го држи моделот „ролекс дејтона“ (Rolex Daytona) на Пол Њуман.

Славниот актер го продаде часовникот во 2017 година за рекордни 25 милиони долари. Овој култен примерок беше подарок од неговата сопруга Џоан Вудворд, а на задната страна беше врежана порака: „Вози внимателно“ (Drive Carefully). Часовникот се истакнува со својот црно-крем бројчаник и три подбројчаници, дизајн карактеристичен за таканаречената верзија „exotic dial“ на „ролекс дејтона“ од тој период.

„Ролекс дејтона“ не само што е симбол на страста на Њуман кон автомобилските трки туку стана и еден од најпознатите и најпосакувани модели меѓу колекционерите на луксузни часовници низ светот. Неговата продажба на аукција означи пресвртница во вреднувањето на часовниците поврзани со славни личности и нивните лични приказни.

Ленон беше познат како колекционер на скапи и донекаде бизарни работи, известува „Њујоркер“ (New Yorker). Меѓу другото, пет стана во зградата Дакота на Менхетн во Њујорк, од кои еден служеше само како магацин за неговите инструменти. Потоа се наведуваат и три џубокса, па дури и златен саркофаг во кој е погребана египетска принцеза, за која Оно мислела дека е нејзина реинкарнација. Но мистериозниот часовник е единствениот што музичарот го носел на рака. Магазинот наведува дека Оно била уверена дека часовникот всушност цело време бил во еден од становите во Дакота, додека не беше пронајден по неколку децении.

Настап на Џон Ленон Bloomberg Mercury

На задната страна е врежано „(Just Like) Starting Over Love Yoko 10-9-1980 N.Y.C.“. Ова се однесува на песната „(Just Like) Starting Over“. Оваа песна, објавена во 1980 година на албумот на Ленон „Double Fantasy“ ги слави обновената љубов и новите почетоци, одразувајќи ја нивната врска по периодот на разделба. Ова се однесува на периодот од 1973 година, кога Оно го напушти, а тој започна врска со асистентката Меј Панг. Интересно е што токму Оно го иницираше тој однос. Верувајќи дека на Ленон му треба простор, предложи да започне врска со Панг, која тогаш работеше како нивна асистентка.

Jоко Оно во катедралата „Св. Пол“ во Лондон (2006) Bloomberg Mercury

Во документарецот од 2023 година „Изгубениот викенд: љубовна приказна“ (The Lost Weekend: A Love Story), Панг го опишува своето искуство со Ленон, давајќи увид во нивната врска и предизвиците што доаѓаа со фактот дека беше меѓу него и Оно. Таа детално зборува за моментите на емоционална поврзаност, креативната соработка и компликациите што ја обележаа нивната необична врска.

Врската заврши кога Ленон во 1975 година се смири со Оно. Откако ја обновија врската, одлучија да ги обноват своите завети на годишнината од бракот. Истиот месец објавија среќна вест дека очекуваат дете. Шон Таро Оно Ленон е роден на 9 октомври истата година, кога исто така беше 35-от роденден на трагично загинатиот уметник.

Инаку, во моментов на „Сотби“ (Sotheby’s) може да се најде колекција на меморабилии од забавната и музичката индустрија на која е застапен и Ленон. Негова фотографија, дело на Дезо Хофман, се продава за 1.200 долари, а групна фотографија од неговото средно училиште чини 1.500 долари. Во понудата се и дела на самиот Ленон, како што се „Алфабет“ (Alphabet) и „Бег уан аутограф“ (Bag One Autographed), литографии што чинат по 10 илјади долари секоја.

Оригиналната концертна програма од настанот „Night of a Hundred Stars“, кој се одржа во „Лондон паладиум“ во јули 1964 година, претставува извонредна колекционерска вредност. На овој настан настапија „Битлси“, а присуствуваа и многу истакнати гости, како што се Лоренс Оливие, Ричард Атенборо и Џуди Гарланд. Програмата од 34 страници содржи цртеж на Џон Ленон на насловната страница, а се продава за 450 долари.