Часовник „патек филип“ (Patek Philippe) што Џон Ленон го добил од својата сопруга Јоко Оно непосредно пред атентатот во 1980 година е откриен во Женева, откако беше исчезнат со години.
Часовникот на еден од членовите на популарната група „Битлси“ моментално го поседуваат адвокати на италијански колекционер на часовници, кој го купил од сега непостојната германска аукциска куќа, според официјалните правни документи од судот во Женева. Оно му го подарила часовникот на Ленон за неговиот 40-ти роденден, а сомнежите се дека часовникот одамна го украл поранешниот возач на јапонската артистка.
Хронографот „патек филип 2499“ е во центарот на долгогодишниот правен спор помеѓу вдовицата на Ленон и неидентификуваниот колекционер на часовници, кој дури сега излегува на виделина. Во јуни, судот во Женева, пресуди дека Оно е вистинската сопственичка на часовникот, а колекционерот се жали, според судските документи.
Исчезнатиот рачен часовник долго време се сметаше за свет грал за колекционерите и може да биде еден од највредните часовници во светот.
Иако одлуката на судот не ги спомнува Ленон ниту Оно по име, биографските детали јасно ги идентификуваат. Во тужбата се споменува нејзината националност и дека тој бил убиен пред неговиот дом два месеца откако наполнил 40 години.
Патек филип хронограф
Адвокатот од Женева што ја застапува Оно во случајот, Мишел Васмер, не одговори на барањата за коментар по телефон и е-пошта. Одлуката на судот првпат беше објавена од швајцарскиот правен блог „Готам сити“.
„Ова е несомнено еден од најбараните часовници што светот се надеваше дека повторно ќе ги види“, рече Марк Монтањ, автор на книгата „Инвестиции во часовници: Уметност на колекцијата на часовници“ (Invest in Watches: The Art of Watch Collecting).
Во 2014 година, една компанија од Женева контактирала со Оно во обид да постави сума за часовникот, кој бил купен за 600.000 швајцарски франци (672.000 долари) од италијански колекционер на часовници што живеел во Хонгконг, покажуваат судските документи.
Со тоа започна правна битка бидејќи Оно поднесе тужба за враќање на, како што вели, својата законска сопственост над часовникот. Колекционерот тврдеше дека Оно не го пријавила часовникот за украден и не постапила во рок од три години од кражбата, како што налага законот во државата Њујорк, каде што живее, покажуваат документите.
Адвокатите на Оно рекоа дека часовникот би можел да биде проценет на 4 милиони франци, што е еквивалент на 4,5 милиони долари, се наведува во судската пријава. Експертите, сепак, сугерираат дека часовникот би можел да вреди многу повеќе со оглед на местото на пејачката во музичката и културната историја.
„Ролекс дејтона“ (Rolex Daytona) на Пол Њумен достигна цена од 17 милиони долари кога беше ставен на аукција во 2017 година, поставувајќи рекордна цена за рачен часовник.
„Патек“ на Ленон најверојатно би достигнал цена помеѓу 5 и 10 милиони франци ако се појави на аукција, смета Монтањ.
„Очигледно потеклото, но и мистеријата околу часовникот, е клучен елемент“, рече тој.
.webp){kind=icon}
