Најпознатиот индиски дизајнер на венчаници вели дека се ближи крајот за индустријата на која тој ѝ помогнал да се искачи до незамисливи височини.
Продажбата на гламурозни венчаници, кои вообичаено тежат до осум килограми и чинат повеќе од 6.800 американски долари, рапидно опаѓа, вели Сабјасачи Мукерџи, кој облекувал некои од најбогатите жени во Индија, меѓу кои и милијардерката Иша Амбани. Сè поголем број младенци бараат поскромни дизајни, како дел од поширокото оддалечување од традиционално наметливите свадбени прослави, рече тој.
Студиото на Сабјасачи во Мумбај
Фото: „Блумберг“
„Индустријата за венчаници во Индија, каква што ја знаеме денес, е на работ на истребување“, рече Мукерџи во интервјуто во неговата продавница од 2.323 квадратни метри во Мумбај.
Постојаниот економски раст го трансформира индискиот потрошувачки пазар, а сè побогатото население ја направи земјата еден од најбрзорастечките пазари на луксуз во светот.
Бројот на луѓе со нето-вредност од над 30 милиони долари се очекува да порасне за 50 проценти во периодот меѓу 2023 и 2028 година, проценува консултантската куќа „Мекинзи“ (McKinsey & Co.). Сепак, според консултантите, ќе експлодира и бројот на амбициозни потрошувачи и ќе достигне 100 милиони до 2027 година.
Тоа претставува огромна можност, а Мукерџи рече дека има зголемување на купувањето „поедноставни“ сарија. „Но тоа исто така го направи градењето на пазарниот удел борба за опстанок на најсилните“, рече тој. Неговата компанија, според процените, годинава ќе заработи околу 60 милиони американски долари.
Мукерџи вели дека неговиот моментален фокус е на отворање нови продавници во Индија пред да започне глобална експанзија, како и лансирање дополнителни линии на производи.
Тоа вклучува проширување на понудата за накит, која веќе сочинува околу една четвртина од приходите и наскоро ќе ја надмине продажбата на облека на неговиот бренд, вклучувајќи ги и помалите парчиња по конкурентни цени. Парфемите и козметиката треба да бидат лансирани во рок од една година, а Мукерџи рече дека сака да ја искористи и својата линија на тапети и мебел за дизајнирање домови и хотели.
„Никогаш не го сметав ’Сабјасачи’ за моден бренд, тоа е бренд за животен стил“, рече тој. Некои од неговите планови за проширување ќе се потпираат на соработки, додаде тој. Тој претходно работел со „Хенес и Мауриц“ (Hennes & Mauritz AB) и „Старбакс“ (Starbucks Corp.), како и со „Бергдорф гудман“ (Bergdorf Goodman).
Растот на индискиот премиум сектор привлекува некои од најбогатите тајкуни во земјата. „Рилајанс брендс“ (Reliance Brands Ltd.) на Мукеш Амбани инвестираше во „Ем-ем стајлс“ (MM Styles Ltd.), која е сопственик на истоимената модна куќа водена од боливудскиот стилист Маниш Малхотра. Конгломератот исто така стекна 52 отсто удел во брендот на Риту Кумар, друг индиски дизајнер.
И Кумар Мангалам Бирла го прошири своето присуство во луксузниот сектор. Тоа вклучува 51 отсто удел во брендот „Сабјасачи“ (Sabyasachi) на Мукерџи, купен во 2021 година.
Таа поддршка е клучна за амбициите на Мукерџи да изгради домашен луксузен бренд што може да им конкурира на европските и американските брендови. „Наскоро модата од Индија ќе го преплави светот и јас сакам да бидам дел од тој моден бран“, рече тој.
.webp){kind=icon}
Во моментов нема коментари за веста. Биди прв да коментира...