Христијан Бузалковски е првиот Македонец што доби покана да учествува на легендарната трка „24 часа Ле Ман“, која е дел од ФИМ Светскиот шампионат по издржливост (FIM World Endurance Championship). Нашиот мотоциклист се најде во ова елитно друштво откако минатиот месец доби покана да се натпреварува за тимот Јунисерв Мото 82 (Uniserv Moto 82), со седиште во Чешка.
„Чувствувам дека сум подготвен. Ова е историски подвиг за домашниот мотоспорт и среќен сум што две недели по моето регрутирање идентична понуда доби уште еден Македонец, мојот ривал и добар пријател Синиша Кочоски, со кого редовно се натпреваруваме на европските шампионати“, вели Бузалковски за „Блумберг Адрија“.
Трката „24 часа Ле Ман“ се одржува од 1978 година во истоимениот главен град на департманот Сарт во Франција. На патеката „Бугати сркат“ (Bugatti Circuit), долга 4.185 километри, сите натпреварувачи од пријавениот тим (најчесто четворица н.з.) возат ист мотор едно деноноќие без престан и токму тој оригинален концепт ја прави толку посебна за професионалните возачи, од кои, освен брзина, се бараат и исклучителна претпазливост и мудрост.
„Ќе возиме со последниот модел 'кавасаки' од 1.000 кубни сантиметри (Kawasaki ZX-10R), подготвен со спецификација Суперсток, што значи дека моторот ќе биде сериски, само ќе има измени околу суспензијата, електрониката и преносот. Веќе на први април одиме на тест за да се запознаам со другите возачи од екипата и да се приспособам на моторот и на патеката, која, сепак, за мене е непознат терен и ќе ми треба малку време да се навикнам“, раскажува македонскиот мотоциклист.
Лична архива
Најтешката трка на светот, како што ја нарекуваат возачите, годинава е закажана на 19 април, но Бузалковски и неговиот тим прво треба да се квалификуваат. Потребно е да не бидат побавни од прворангираниот во нивната класа (110 отсто), односно да не заостануваат повеќе од 10 секунди на еден круг. Квалификациите практично траат до почетокот на трката, па за нив ќе биде возбудливо и неизвесно до последниот „варм ап“, кога конечно ќе знаат дали се пласирале.
Пред секоја трка Бузалковски ја анализира датата. Вели дека ако возачот во одреден момент се дефокусира, може да изгуби и две-три секунди по круг.
„Секогаш недостига мал сегмент за да напредуваме од половина до секунда секој круг. Го проверуваме целиот мотор и правиме анализа буквално до последниот момент. Пред трка многу мисли ми поминуваат во глава, како дали ќе стартувам добро или дали ќе влезам добро во првата кривина, која е најважна на една трка. Кога ќе тргнеме, веќе е друго, тогаш се фокусирам само на една цел, а тоа е како да возам што побрзо“, вели тој.
Еден од поскапите спортови
Освен трка, „24 часа Ле Ман“ истовремено е и престижен светски настан за мотоспорт, кој ги обединува најдобрите професионални возачи и најголемите производители на мотоцикли и на кој се вртат големи пари. Секоја година, во просек, го посетуваат 200.000 луѓе, а влезниците се однапред распродадени. Тимовите што се во самиот врв на светскиот мотоциклизам издвојуваат огромни буџети за да се претстават во најдобро светло. Кај нас трошоците се сведени на минимум.
Лична архива
„Овој подвиг ќе чини повеќе од 15.000 евра, сума во која сѐ е минимализирано до детаљ. Нашите колеги од развиените земји вложуваат и трошат многу повеќе“, вели македонскиот спортист.
Дел од парите е обезбеден од спонзори, а дел од трошоците ќе покрие новоформираното министерство за спорт. Освен финансиите, за Бузалковски посебен предизвик се и подготовките. Во Македонија нема тркачка патека, ниту пак продавница во која може да ги најде сите резервни делови што му се потребни, па е принуден да ги нарачува онлајн од други земји, а со тоа и да плаќа данок за нив.
„За секој тренинг треба да поминам граница затоа што најблиската патека се наоѓа на околу 300 километри од мојот дом, во соседна Грција. Тоа се многу дополнителни трошоци, но кога се соочувате со ваква ситуација, мотивираноста е уште поголема. Имам јасна цел за која планирам да се изборам, па полесно ги пребродувам овие моменти“, истакнува 28-годишниот мотоциклист.
Ништо не е случајно
Христијан Бузалковски е петкратен државен првак. Негов најголем успех досега е освоениот бронзен медал на ФИМ Европскиот шампионат во 2023 година, во класата STK1.000.
За да биде постојано во врвна форма, тренира два-три пати дневно. Освен на физичката, еднакво е фокусиран и на менталната подготвеност. Во тимот се вклучени десетина луѓе, кои ги координира неговиот брат, поранешниот мотоциклист Никола Бузалковски.
„Сите мои професионални успеси се негова заслуга. Затоа и на моторот го носам бројот 71, со кој тој претходно се натпреваруваше“, открива Христијан.
.webp){kind=icon}
