Ешли Мареро не е мажена и нема деца. И таа има порака за жените како неа: Сè уште можете да го имате сето тоа.
43-годишната жена има длабоко чувство на задоволство од нејзината работа како претставник за продажба на производител на медицински помагала, што ја доведува во контакт со пациентите. Таа ужива во нејзиниот начин на живот и финансиските слободи кои доаѓаат со тоа што е сингл, жена без деца, на добро платена работа. Тоа вклучува стан во Њујорк, нова куќа на плажа на брегот на Џерси и чести деловни, но и патувања од задоволство.
„Го сакам мојот живот и се чувствувам многу исполнето“, вели Мареро, која ги замрзнала нејзините јајце-клетки во 2018 година за да си ги задржи опциите отворени. „Сакам деца и ги сакам децата на сите мои пријатели. Но, не знам дали би го сакала мојот живот со деца“.
Просечно семејно богатство во САД (2019 година)
Bloomberg
Мареро припаѓа на сè поголема група жени кои го одложуваат мајчинството или целосно се откажуваат од него. Притоа, многу од нив напредуваат понатаму во нивните кариери во споредба со претходните генерации и влегуваат во нови нивоа на богатство. Сингл жените без деца имале просечно богатство од 65.000 долари во 2019 година, во споредба со 57.000 долари кај сингл мажите без деца, според новото истражување на Банката на федерални резерви на Сент Луис. За самохраните мајки оваа бројка изнесувала само 7.000 долари.
Родителството ја губеше својата привлечност дури и пред Ковид-19, а тешкотиите што ги донесе пандемијата се чини дека го забрзаа трендот. Студија на Pew Research Center минатата година покажа дека 44 отсто од Американците на возраст од 18-49 години кои немаат деца велат дека не е многу веројатно или воопшто не е веројатно дека некогаш ќе имаат деца - што е зголемување за 7 процентни поени од 2018 година.
Стапката на наталитет во САД се намалува во последните 30 години, бидејќи луѓето се венчаат подоцна во животот и го одложуваат имањето на деца. Во 1990 година имало околу 71 раѓање годишно на секои 1.000 жени на возраст од 15 до 44 години. До 2019 година тоа се намалило на 58 раѓања, според анализата на Бирото за попис. Во исто време, уделот на жени на возраст од 25 до 34 години кои немаат деца достигна рекорд во 2018 година, во однос на достапните податоци кои датираат од 1976 година.
Многу експерти укажуваат на зголемените трошоци за подигање семејство како важен фактор во одлуката на Американците да имаат помало или да останат без потомство. Трошоците за грижа за дете родено во 2015 година до неговата 17-годишна возраст ќе изнесуваат околу 310.605 долари, според Brookings Institution, која ја приспособи владината пресметка за да се прилагоди на трендовите на инфлација, додавајќи околу 26.000 долари. Проекцијата не ги вклучува трошоците за факултетско образование.
Има и други трошоци што треба да се земат предвид. Неколку студии покажаа дека вработените жени подлежат на „мајчинска казна“ за време на бременоста или по раѓањето. Во истражувањето пред пандемијата, Џули Кашен, директорка за женска економска правда во тинк-тенкот Century Foundation, го определи износот на казната на 15 отсто од годишниот приход за секое дете под 5-годишна возраст, со тоа што Афроамериканките и Латиноамериканките имаат поголем товар од белите жени. „Имањето деца остава последица врз вашата заработка“, вели Кашен. „Целата на женското движење е да го максимизира изборот за жените, така што секој избор е важен. Приходот не треба да биде нешто што би имало влијание врз тоа, а во моментот е целосно спротивно“.
Мелиса Керни, професорка по економија на Универзитетот во Мериленд, тврди дека културните промени исто така придонесуваат жените да го одложат или прескокнат мајчинството. Американците кои биле тинејџери во 90-тите и раните 2000-ти пораснаа со различен сет на норми околу родителството и жените кои имаат кариера. „Се чини дека приоритетите на луѓето се сменија“, вели Керни, која е и директорка на Групата за економска стратегија Aspen и мајка на три деца. „Не мора да значи дека луѓето имаат помала желба за деца или дека тоа е многу поскапо или дека грижата за деца одзема премногу време. Се работи за начинот на кој сите овие работи се согледуваат од оваа генерација наспроти претходните“.
Мареро, која била во брак четири години пред да се разведе во 2008 година, ужива завиден степен на финансиска независност. Таа е жителка на Вест Вилиџ односно поседува свој стан, кој го купила во 2019 година за околу 900.000 долари, а потоа го реновирала. Во јуни таа склучила договор за викенд куќа на островот Лонг Бич во Њу Џерси, заедно со нејзината сестра Кристина, која е неколку години постара и исто така сингл без деца. Ешли вели дека била на 10 патувања во последните 12 месеци, често со пријатели од група од околу 25 луѓе кои главно не се во брак и немаат деца.
Ана Диксон / Bloomberg Businessweek
„Оваа група ми беше толку интересна, привлечна и фасцинантна“, вели Ана Диксон (41), која неодамна отпатувала во долината Напа со Мареро и некои од нивните пријатели. „Сите овие луѓе се толку паметни, талентирани и немаат деца - тие се многу независни“, додава Диксон, продукт менаџер во Google, која е разведена и сега живее со своето момче на Менхетен. „Веднаш заклучив дека го сакам сето тоа и за себе“.
Животот што Мареро и Диксон го избрале има свои недостатоци. Луѓето кои се сами и без деца плаќаат повеќе даноци. Домувањето е многу потешко да се дозволи со еден приход отколку со два, особено со тековните цени на домовите и кириите кои се рекордно високи, а хипотекарните стапки во пораст. Друга грижа за оние без деца е кој ќе се грижи за нив во нивната старост.
За Диксон, предностите на родителството не ги надминуваат минусите. „Сакам да патувам, да одам каде и кога сакам“, вели Диксон, чии авантури со нејзините блиски пријатели кои ги смета за семејство изминатата година вклчувале патувања во Алјаска и Ангвила. „Подобро ми е да жалам што немам деца, отколку да жалам што ги имам“, додава таа.
Што се однесува до Мареро, таа сè уште плаќа за да ги складира јајце-клетките во случај да се премисли. Но, таа е сигурна дека дури и да не го стори тоа, нема да се чувствува како нешто да пропуштила. „Немањето деца може да е или не е ваш избор“, вели таа. „Но, тоа не треба да има никаква врска со вашата среќа. Можете да бидете многу среќни доколку одите и по овој пат“.
.webp){kind=icon}
