Како Тикток претвори анонимна писателка во сензација на Нетфликс

Кали Харт го опишува својот самоиздаден роман „Квиксилвер“ (Quicksilver) од 2024 година како свој потег на просветлување. Оваа писателка од Калифорнија напишала десетина мрачно романтични романи низ годините, но ова е нејзиниот прв чекор во светот на романтазијата (англ. romantasy) – жанр што ги спојува епските заплети и магиските светови на фантастиката со силни, судбински поврзани љубовни приказни типични за романсите.

„Последните неколку мои изданија финансиски не поминаа добро, па притисокот беше огромен – мораше да постигнам успех за да можам да продолжам да пишувам со полно работно време и да го издржувам семејството“, вели Харт. „Бев во војна со себе: дали да продолжам да пишувам за тоа што го знам или да ризикувам и да се надевам дека романтазијата ќе успее?“

И успеа. За помалку од 18 месеци од самоиздавањето на „Квиксилвер“, нејзините 43 книги се продадоа во повеќе од милион примероци, доби традиционален издавачки договор по аукција во која учествуваа десет издавачи и потпиша наводно седумцифрен договор со Нетфликс за екранизација (деталите не се објавени). Романот ја следи разбојничката Саерис, која влегува во друг свет, открива алхемиски сили и се заљубува во намачениот, 1.700 години стар елфски војник Кингфишер.

„Квиксилвер“ е дел од многу поширок тренд што ја потресува издавачката индустрија. Продажбата на романтазиите достигна 610 милиони долари во 2024 година. Една од четирите книги на листата на бестселери на „Њујорк тајмс“ (New York Times) беше од овој жанр. Најпродавана авторка во САД минатата година беше Сара Џ. Мас. А „Оникс сторм“ (Onyx Storm) на Ребека Јарос стана најбрзо продавана книга за возрасни во последните 20 години - 2,7 милиони примероци во првата недела.

„Бримстон“ (Brimstone), продолжението на „Квиксилвер“ (Quicksilver) и втора книга во трилогијата, само што ја имаше својата светска премиера, а веќе е број еден на новите изданија на „Амазон“. Најавени се и забави за полноќни изданија низ САД, вклучувајќи една и во „Барнс енд Нобл“ (Barnes & Noble Union Square) во Њујорк, на која Харт ќе присуствува. „Возбудена сум што ја пишувам оваа приказна бидејќи ги проширува елементите на ‘пронајдено семејство’ од првата книга и силно говори за надминување на пречките по секоја цена“, вели авторката.

Во разговор пред излегувањето на книгата, авторката зборува за притисокот што сега го чувствува како авторка на бестселери, улогата на тикток-заедницата Букток (BookTok) врз нејзиниот успех и за тоа зошто романтазиите се толку привлечни за читателите. Интервјуто е скратено заради јасност.

Дали притисокот е поголем пред излегувањето на „Бримстон“, имајќи го предвид огромниот успех на „Квиксилвер“?

Навистина сум благодарна што „Квиксилвер“ постигна таков успех, но тоа значи дека сега многу луѓе вложуваат емоции во продолжението на приказната. Тоа е неверојатно стресно. Пишувањето на втората книга во трилогијата секогаш е тешко, бидејќи големите емотивни моменти веќе биле во првата – „те сакам“, интимност, силни сцени. Тешко е да се одржи таа хемија или да се засили. Се фокусирав на тоа романтиката да биде уште подобра отколку во првата книга, бидејќи средните книги често ги нарекуваат „филери“, што сакав да го избегнам по секоја цена.

Можеме ли да зборуваме за вашата стратегија на социјалните мрежи? Тикток, изгледа, одигра клучна улога.

Социјалните мрежи не ми се терен - јас сум интроверт и не се чувствувам удобно да се „туркам“ и нешто да продавам. Тикток едвај користев; имав можеби 5.000 следбеници. Кога излезе „Квиксилвер“, не одеше добро. Продажбата беше катастрофална, книгата едноставно исчезна и тоа ме скрши.

Тоа беше во јуни минатата година, 4 јуни. Тие први недели беа брутални. Потоа решив: доста е. Ќе пробам стратегија. Го прегледав хаштагот #romantasy, најдов „буктокери“ на кои книгата навистина би им се допаднала и им пратив порака дека со задоволство ќе им испратам копија. Околу 15 прифатија.

Три девојки започнаа да читаат веднаш и за само неколку дена, книгата експлодира. Рецензиите станаа вирални, а книгата изби на прво место на „Амазон“ во рок од неколку недели. Беше неверојатно. Виралноста може да ве извлече од целосна анонимност.

Денес на Тикток гледам луѓе како навлегуваат во моите ликови и глумат сцени – уште ми изгледа неверојатно.

Потоа имавте десеткратна аукција за издавачки права и договор со Нетфликс. Дали доживеавте сензација на успех?

Аукцијата беше луда. За тоа сонувам со години. А потоа, сè се случи одеднаш – сите три мои најголеми желби се остварија во текот на неделата на мојот роденден: договор со Нетфликс, влез на листата на „Њујорк тајмс“ и традиционално издавање.

Дали ги следите тикток-теориите на обожавателите?

Не. Не гледам и не читам теории. Тоа не е за мене – тоа е простор за читателите.

Зошто мислите дека романтазиите се толку привлечни?

Заради бегството од реалноста, но и поради романтиката. Идејата дека моќни бесмртни суштества нè сакаат нас – смртните, несовршените, е длабоко романтична. Тука е и фантазијата за тоа дека ќе те однесат во друг свет, дека ќе добиеш моќи за кои не си ни сонувал и дека ќе имаш неверојатно привлечен партнер што ќе те штити. Спојот на фантастиката и романтиката е неодолив.

Дали несигурните времиња ја зголемуваат потребата за бегство преку книги?

Апсолутно. Жанрот експлодираше за време на пандемијата, бидејќи сите бевме затворени дома, опкружени со лоши вести, а книгите нудеа одмор од сè.

Што понатаму?

Работам на трета книга и ќе работам уште некое време. Потоа, сакам да напишам самостоен роман, кој ќе биде мешавина на научна фантастика и фантастика. Сакам да истражувам нови форми, можеби и сценариo. Но, исто така, сакам да се одморам малку.