Приказната за најбогатите династии во светот во текот на изминатата година потврдува една финансиска вистина: големината е важна.
Вкупно 25-те најбогати семејства заедно се побогати за 358,7 милијарди долари во однос на претходната година, со вкупно богатство од 2,9 билиони долари. Нивното богатство пораснало благодарение на растот на цените на акциите и побарувачката за стоки како што се метали и храна за домашни миленици, но и благодарение на влијанието и искуството што ги акумулирале во текот на децениите.
Волтон, основачкото семејство на компанијата „Волмарт“ (Walmart Inc.), годинава повторно ја предводи листата со нето-богатство што првпат преминува половина билион долари. Минималното богатство потребно за место на листата е поголемо од кога било: 46,4 милијарди долари, што е 9,7 милијарди повеќе од минатата година.
Преку своите продавници, „Волмарт“ услужува 270 милиони клиенти секоја недела
Michael Nagh/Bloomberg
Четири семејства од четири различни континенти првпат влегуваат на листата. Кланот Лареа Мота Веласко од Мексико и семејството Луксик од Чиле управуваат со империите што се формирале од рударството на бакар. Семејството Дел Векио од Италија се збогатило преку „Есилор луксотика“ (EssilorLuxottica SA), чиј влез во ВИ-очила го поттикна растот на акциите. Саудиското семејство Олајан, со глобално работење и врски со Волстрит, дополнително го засилило своето значење како дома, така и во странство. Но да почнеме по ред.
Леонардо дел Векио
Stefania D'Alessandro/Getty Images Europe
Семејството Волтон, основачи на „Волмарт“, повторно е на првото место. Нивното богатство првпат премина половина билион долари. „Волмарт“ е најголемата светска малопродажна мрежа по приход, со повеќе од 10.750 продавници низ светот и годишни приходи од 681 милијарда долари. Волтон поседуваат околу 44 отсто од компанијата, што ја чини основата на најголемото семејно богатство во светот.
На второто место се наоѓа владејачкото семејство Ал Нахјан од Обединетите Арапски Емирати (ОАЕ), со богатство од 335,9 милијарди долари. Нивната моќ потекнува од контролата на Абу Даби, срцето на нафтените резерви на ОАЕ, но денес се шири и преку големи инвестиции во вештачка интелигенција и глобални финансиски пазари.
Шеикот Мохамед бин Зајед ал Нахјан, претседател на Обединетите Арапски Емирати, десно, се ракува со шеикот Мохамед бин Рашид ал Мактум, владетел на Дубаи, на саемот за воздухопловство во Дубаи во ноември.
Christopher Pike/Bloomberg
Третото место го зазема саудиското кралско семејство Ал Сауд, чие богатство се проценува на 213,6 милијарди долари. Нивното богатство е вкоренето во нафтата, државните договори и контролата на суверен фонд ПИФ (PIF), кој управува со имот вреден околу еден билион долари.
Семејството Ал Тани од Катар, со богатство од 199,5 милијарди долари, владее со земјата уште од 19 век. Првичниот извор на нивната денешна моќ е експлоатацијата на огромните гасни полиња, додека членовите на семејството поседуваат недвижности и инвестиции низ светот, од Лондон до луксузната модна куќа „Валентино“ (Valentino).
Традиционалниот пристап и силната ценовна моќ се предностите на „Хермес“
Bloomberg
На петтото место е француското семејство Хермес, сопственици на истоимениот луксузен бренд, со богатство од 184,5 милијарди долари. Брендот познат по чантите „биркин“ останува еден од најпосакуваните симболи на луксуз, а семејството и натаму цврсто ја контролира компанијата во шестата генерација.
Следуваат американските семејства Коч (150,5 милијарди долари) и Марс (143,4 милијарди долари). „Коч“ (Koch Inc.) е индустриски конгломерат, додека „Марс“ (Mars Inc.) е познат по брендови како M&M, „сникерс“ и голем бизнис во областа на храна за домашни миленици.
Мукеш Амбани
Prakash Singh/Bloomberg
Индиското семејство Амбани, со богатство од 105,6 милијарди долари, стои зад конгломератот РИ (Reliance Industries), кој го вклучува најголемиот светски комплекс за преработка на нафта. Мукеш Амбани живее во една од најскапите приватни резиденции во светот.
Во секторот на луксузот, значајно место имаат и семејствата Вертхајмер („Шанел“), со 85,6 милијарди долари на деветтото место, Фереро (54,9 милијарди долари, 20. место на листата), како и Дел Векио, сопственици на „Есилор луксотика“, гигант во индустријата за очила (56,2 милијарди долари, 18. место на листата).
Огромното богатство на луксузниот бренд „Шанел“ преминува на четвртата генерација
Nathan Laine/Bloomberg
На десеттото место на листата се наоѓа семејството Томсон од Канада, кое го стекнало своето богатство во медиумската индустрија. Нивната приказна започнува на почетокот на 1930-тите, кога Рој Томсон отворил радиостаница во Онтарио. Потоа се проширил на весници и станал водечки медиумски сопственик во Канада, а потоа ја добил и титулата прв барон Томсон од Флит. Семејството денес држи околу 70 отсто удел во компанијата „Томсон ројтерс“ (Thomson Reuters), која обезбедува финансиски податоци и услуги, преку својата инвестициска фирма „Вудбриџ“ (Woodbridge). Компанијата со седиште во Торонто лани остварила приход од речиси 7,3 милијарди долари.
На листата се наоѓаат и индустриски и финансиски династии како Џонсон („Фиделити инвестментс“), Каргил-Мекмилан („Каргил“), Хофман-Оери („Роше“) и Прицкер („Хајат хотели“).
Семејството Квнд, сопственици на БМВ, е рангирано на 15-то место на листата со богатство од 61,3 милијарда долари.
Листата ја затвораат семејствата Олајан од Саудиска Арабија, Данкан од САД и Луксик од Чиле, чие богатство се проценува помеѓу 46 и 50 милијарди долари – што е денешниот минимум потребен за влез во 25-те најбогати семејства во светот.
Напомена:
Во изработката на текстот учествувале: Биз Карсон, Аманда Гордон, Даниеле Лепидо, Том Малони, Анучит Нгуен, Мајкл О'Бојл, Тара Пател, П.Р. Санџаи, Дилан Слоун, Бен Стаплс и Пуи Гвен Јунг.
Методологија:
Податоците за богатството се ажурирани на 9 декември 2025. Ранг-листата ги исклучува богатството на првата генерација и она што го контролира само еден наследник. Исто така, исклучени се семејствата чии извори на богатството се премногу раздвоени или нејасни за да може да се проценат.
.webp){kind=icon}
