Во време кога корпоративната култура повеќе не се обликува само во канцелариите туку и низ неформални заеднички искуства, а границата помеѓу работното и приватното време станува сѐ пофлексибилна, компаниите бараат нови формати што ја зајакнуваат поврзаноста меѓу вработените. Еден од тие концепти е таканаречениот паб-квиз (pub quiz), тимски натпревар што експресно стана водечки корпоративен ритуал, настан што ги спојува знаењето и забавата во опуштена, но јасно структурирана средина.
Сега, овој формат за првпат се организира и кај нас. Во официјалната најава пишува дека првенството е внимателно осмислено како комбинација од интелектуален предизвик, тимска стратегија и опуштена атмосфера, а целта е да создаде искуство што ги поврзува луѓето надвор од секојдневните работни улоги.
„Во Западна Европа, па дури и во соседството (Србија, Црна Гора и Хрватска како лидер), паб-квиз културата е на многу високо ниво, додека кај нас речиси и не е присутна. Во комуникација со многу пријатели, компании и соработници, речиси сите по посета на некоја земја надвор од Македонија го спомнуваат трендот на одење во паб, пијачка и квиз и токму тоа нѐ мотивираше да го донесеме и кај нас“, вели организаторот Ѓоко Ангеловски-Цуре, основач и сопственик на „Афтерворк“, агенција за организирање тим-билдинзи.
Depositphotos
Искуството во оваа работа му покажало дека освен патувања и спортски активности, вработените сѐ повеќе бараат и квалитетни интелектуални предизвици, а паб-квизот, според него, ја нуди токму таа рамнотежа на забава и соработка и ги поврзува колегите на сосема нов начин.
Во разговорот за „Блумберг Адрија“ тој истакнува дека проектот е развиван повеќе од една година, низ детално истражување на корпоративниот пазар.
„Знаеме дека многу наши компании со кои соработуваме цело време се во потрага по нешто ново и интересно за своите вработени/колеги, да направат нешто заедничко надвор од работата и работното време. Паб-квизот сега станува дел од тоа и се надеваме дека ќе мотивираме многу други ентузијасти да преземат слични иницијативи. Не треба ништо да се измисли, туку само да се преземат искуствата од веќе постојните концепти со приспособување на нашиот пазар“, вели тој.
Квизот е замислен како првенство од четири кола и ќе се одржува во познат скопски угостителски објект. Ќе стартува на втори февруари, а активен учесник и дел од проектот е и Македонската квиз-асоцијација (МКА). Ангеловски објаснува дека станува збор за концепт сличен на бизнис-лига во фудбал, кој веќе со години опстојува кај нас како спортски натпревар помеѓу компаниите.
„Концептот е континуитет, а не еднократен настан. Преку четири кола тимовите се развиваат, учат како подобро да соработуваат и постепено градат стратегија. Секое коло има од 10 до 12 сетови на прашања со различни теми, со фокус на Македонија и на урбаната култура. Правилата на игра се многу едноставни. Секој сет содржи по неколку прашања, дел се со понудени одговори од кои еден е точен, дел се со дополнување, а на дел од нив се одговара директно со погодување поим, име или настан, со определено време за размислување“, информира нашиот соговорник.
Depositphotos
Од натпреварувачите се бараат тимска дискусија и заедничка одлука. Забрането е користење мобилен телефон за време на прашањата и дофрлање од публиката. За секој точен одговор се добиваат поени, кои се акумулираат на дневно ниво, но и се пренесуваат во секое наредно коло.
Ангеловски е уверен дека овој квиз значително ќе помогне во зајакнување на комуникацијата меѓу вработените, а оптимизмот го илустрира и со конкретен пример.
„Еден тим се состои од пет луѓе. Доаѓа прашање што навидум е лесно, четворица даваат предлог-одговор, а еден е сомничав, но има ограничено време за размислување. Тука се развива дебата со аргументи, тука се поттикнуваат тимската енергија, доверба и дух“, раскажува тој.
Кога го прашавме која е предноста на овој формат, тој ни одговори дека разликата е што повеќето тим-билдинзи се конципирани за една фирма, додека овде станува збор за натпревар помеѓу повеќе компании.
Деновиве истекува и рокот за пријавување, по што ќе се дефинира и наградниот фонд, кој зависи од вкупниот број на пријавени. Ангеловски вели дека интересот е неочекувано голем и дека нема специфични индустрии или профили на компании што се особено заинтересирани за овој формат.
„Буквално имаме пријавени од сите сфери, од финансии и фармација до медиуми и ИТ-секторот“, открива тој.
Котизацијата за еден тим е 500 евра. Во цената е вклучено храна, промотивни материјали и подароци за сите четири седмици додека трае првенството.
Настаните ќе ги води познатиот македонски актер Филип Трајковиќ.
.webp){kind=icon}
