Непосредно пред Денот на вљубените во 2016 година, Кети Румлер закажала пакет третмани за луксузна нега – масажа од 500 долари во „Мандарин Ориентал“, третман за лице од 340 долари во „Сохо“ (SoHo) и фенирање од 95 долари во елитниот салон „Фекаи“ во Њујорк, сето тоа на сметка на Џефри Епстајн. Две недели подоцна повторно се вратила во салонот на стрижење и фарбање од 660 долари, а Епстајн повторно сакал да плати.
„Верувај ми, него го прави среќен тоа што ќе те направи тебе среќна :)“, напишала Лесли Гроф, тогашна асистентка на осудениот финансиер. „Навистина ме прави среќна, затоа што тоа е толку внимателно и непотребно“, одговорила адвокатката.
Според стандардите на Епстајн, термините во салонот биле скромна привилегија. Тој, на пример, на своите пријатели им испраќал „Епл“ часовници, кашмирски џемпери и дизајнерски чанти. Сепак, овој случај покажува дека станува збор за еден од најчестите трошоци на осудениот педофил, според изводите од кредитните картички и сметките што неодамна ги објави Министерството за правда на САД.
Термините во салонот „Фекаи“, луксузен салон на Петтата авенија, основан од францускиот стилист Фредерик Фекаи, биле организирани за луѓе од мрежата на Епстајн. Тој одржувал кредитна сметка и редовно лично го посетувал салонот, додека стилистите повремено доаѓале и во неговата вила на Аппер Ист Сајд. Неговата девојка, членови на персоналот, неговиот уролог и други чии имиња се избришани од документите исто така имале термини на негова сметка.
Плаќањата во салонот „Фекаи“ на Менхетен, како и во другиот во Палм Бич, опфаќале период подолг од 15 години, сè до непосредно пред смртта на Епстајн во 2019 година, а некои третмани чинеле и повеќе од 500 долари по термин.
Резервациите покажуваат колку на Епстајн му бил важен физичкиот изглед, бидејќи плаќал и избелување на заби и ботокс за луѓето од својот круг, но и колку бил лојален на луксузните њујоршки бизниси кои со години биле дел од неговиот „систем на привилегии“.
Во еден момент, тој плаќал термини во салоните „Фекаи“ толку често што неговите асистенти повремено имале тешкотии да ги следат.
„Здраво девојки, се обидувам да утврдам кој бил во „Фекаи“ на 14 март на фенирање и плетенки и на 25 март на фарбање и шишање“, напишала поранешна членка на персоналот во 2015 година. „Ве молам за помош.“
Фредерик Фекаи и неговата компанија, која денес го поседува главниот салон во „Марк Хотел“ (The Mark Hotel), не одговориле на барањата за коментар. Претставник на Румлер изјавил дека адвокатката не направила ништо погрешно и дека нема што да крие. Румлер ќе ја напушти позицијата главна правничка на „Голдман Сакс“ (Goldman Sachs) кон крајот на јуни.
„Многу пријателски“
Личните врски на Епстајн со основачот на салонот очигледно датираат уште пред да биде доенсена пресудата во 2008 година за поттикнување проституција на малолетнички. Во интервју за Министерството за правда минатата година, Гислејн Максвел ги опишала Фекаи и Епстајн дека имале „пријателски, многу пријателски однос“ во текот на 2000-тите. Фекаи претходно признал дека во тоа време летал со приватниот авион на Епстајн.
Години по пресудата на Епстајн и отслужувањето на затворската казна, документите покажуваат дека Фекаи редовно се појавувал во неговиот општествен круг, вклучувајќи покани на вечера за Јом Кипур и покани да им се придружи на „неколку луѓе“ за роденденска торта во 2013 година.
Сопругата на Фекаи, Ширин фон Вулфен, во 2010 година го поканила Епстајн на „вечер со пијалаци и танцување“ во „Топ оф д Стандард“ (Top of the Standard) – тогаш еден од најексклузивните клубови во Њујорк, познат и како „Бум Бум Рум“ – за да го прослави одликувањето на Фекаи во Франција. „Дали би сакале принцот Ендрју да присуствува на вашата забава во понеделник во ‘Бум Бум’?“, напишал Епстајн. „Да“, одговорил Фекаи.
Е-пошта кореспонденција Епстајн – Фекаи од 2010 година.|Министерство за правда на САД
Фекаи побарал термин со сопствена масерка во просторијата за масажа на Епстајн. Најмалку три пати исто така побарал да „го користи“ или да престојува во станот на адресата 301 Е. 66th St., каде што, како што се наведува, Епстајн ги угостувал своите контакти и некои од своите жртви.
Еден поранешен вработен во њујоршкиот салон изјавил дека млади жени често тврделе дека се семејни пријателки кога доаѓале на термини резервирани на името на Епстајн во системот за закажување. Понекогаш седеле во скутот на Епстајн и му ја чешлале косата за време на неговите посети во салонот, објави „Дејли Бист“ во 2019 година.
Многу документи покажуваат дека луѓе барале одобрение од Епстајн или му се заблагодарувале за термините. „Со нетрпение очекувам да те видам и сакам да те прашам за посета кај Фредерик Фекаи. Бакнежи“, напишало лице чие име е избришано во 2009 година. Епстајн го одобрил терминот. „Ти си најдобар!!!!!!!“, одговорило лицето.
Други примери покажуваат како привилегиите престанувале кога Епстајн чувствувал дека не добива доволно за возврат.
„Џефри, мислиш ли дека твојот фризер би можел да ме истриже бесплатно? Или со голем попуст?“, прашало едно лице. „Секогаш ти е лесно да бараш, а ништо не даваш. Жал ми е“, одговорил Епстајн. Лицето потоа рекло: „Сакаш да те запознаам со млада убава руска манекенка, нели?“
Многу од интеракциите на Фекаи со Епстајн биле насочени кон амбициите на славниот стилист да го прошири или преориентира својот бизнис со салони и производи за коса. Компанијата за која Епстајн тврдеше дека помогнал да се формира го сменила сопственикот во 2008 година, а околу пет години подоцна Епстајн го поврзал Фекаи со инвеститори за да разгледаат нови идеи.
Овие иницијативи не дале резултати. Компанијата во 2015 година била продадена на британско претпријатие, наводно по пониска цена. Три години подоцна, Фекаи се здружил со приватна инвестициска фирма за повторно да ја преземе сопственоста и да го спои брендот со линијата производи што ја развил со сопругата.
На почетокот на 2019 година бил затворен луксузниот продажен објект „Анри Бендел“ (Henri Bendel), каде што се наоѓал главниот салон на Фекаи. Малопродажниот магнат Лес Векснер, кој го ангажирал Епстајн како личен менаџер за пари, но изјавил дека се разделил со него во 2007 година, ги затворил сите продавници. По преселувањето на салонот, некои стилисти, вклучувајќи го и главниот бербер на Епстајн, ја напуштиле компанијата.
Кога веста за заминувањето на стилистите се проширила, Румлер испратила е-пошта до асистентката на Епстајн со наслов: „Криза“.
„Патрик и Ибер го напуштија ‘Фекаи’!“, напишала таа.
„Шокирана сум“, одговорила асистентката во порака испратена околу четири месеци пред смртта на Епстајн. „Ќе му проследам на Џефри… (изгледа ќе одиме во нов салон).“
.webp){kind=icon}
