Зошто Парос од сезона во сезона е најбараниот остров на Кикладите

Првиот впечаток за Парос, особено веднаш по излегувањето од аеродромот, знае да биде лажно скромен. Можно е дури и за момент да се запрашате каде исчезнала убавината што му ја донесе репутацијата на еден од најпосакуваните острови на Кикладите. Остриот пејзаж, каменот, ниската вегетација и сонцето што немилосрдно пече уште од утрото не ветуваат многу сенка ниту спектакуларно зеленило. Но на Парос не се оди поради тоа. За разлика од соседните Миконос и Наксос, тој нуди посебен баланс меѓу луксузот и опуштеноста. Доволно е елегантен за да привлече љубители на добри хотели, ресторани и вечерен живот, а сепак доволно ненаметлив за да го зачува духот на автентична Грција.

Помеѓу традицијата и летниот хедонизам

Главниот град Парикија не е само траектно пристаниште, иако многу туристи го доживуваат така. Неговите кривулести улички полни со расцветани бугенвилии, малите дворови и баровите покрај морето ја имаат онаа медитеранска спонтаност што ве тера боси да седнете „само на еден пијалак“, а неколку часа подоцна да завршите на вечера. Навечер особено оживува шеталиштето покрај морето, како и платото пред црковниот комплекс Панагија Екантопилијани, кој претставува една од најзначајните византиски градби. Потекнува од IV век, а подоцна бил доградуван, што ја објаснува и слоевитоста на архитектурата во која се преплетуваат елементи од различни епохи.

Tamara Kostić

Посебно внимание привлекува крстилницата, која се вбројува меѓу најстарите зачувани во православниот свет, а целиот комплекс и натаму претставува важно место за православните поклоници. Името на островот го прослави и прочуениот бел пароски мермер, еден од најценетите во античкиот свет, користен за голем број познати дела од грчката уметност и скулптура. Тој речиси блескаво бел тон и денес на некој начин ја дефинира локалната естетика, од фасадите на традиционалните куќи и цркви до современите минималистички хотели што во последните години станаа негов заштитен знак.

Полно со карактер — Науса, рибарско гратче на северниот брег/Tamara Kostić

Сепак, без дилема, најфотогенично е Науса, рибарско гратче на северниот брег што во последните години стана синоним за елегантен ноќен живот. Белите куќи, уличките со калдрма и малото пристаниште навечер стануваат сцена за коктели, музика и долги вечери. Местото е доволно мало за насекаде да се оди пеш, а прекуден и доволно мирно, па многумина токму тука резервираат сместување.

Сувенири има на секој чекор/Tamara Kostić

 

И двете места станаа одлични локации за шопинг. За разлика од Миконос, каде што луксузот често доаѓа со агресивна комерцијализација и големи модни синџири, тука доминираат мали бутици и концепт-продавници (concept store) со внимателно избрани ресорт-колекции од грчки и европски дизајнери, минималистички накит и необични сувенири. Најдобро од сè е што најубавите работи најчесто се откриваат случајно, талкајќи низ тесните улички на Науса и Парикија, поради што многумина од Парос си заминуваат со пополн куфер отколку што планирале.

Плажи како од филм/Tamara Kostić

За сосема поинаков и побавен ритам треба да се упатите кон Лефкес, планинско село во внатрешноста на островот. Поранешната престолнина изгледа како да лебди над морето. Без метеж, со камени премини и поглед што се протега кон Егејот, ова е идеално место за доцен ручек, аперитив и неколку часа без телефон.

Во маршрутата задолжително внесете го и Писо Ливади, сместен на источниот брег, кој многу посетители го засакуваат повеќе и од популарните локации. Ресторанските маси веднаш покрај морето, чамците што се нишаат во пристаништето и опуштената атмосфера го прават можеби најпријатното место за вечерно излегување, особено ако повеќе сакате вино и добра риба отколку диџеј-сетови и гласна музика.

Вечера вреди да резервирате во рестораните „Маракакис“ (Markakis), „Галос Парос“ (Gialos Paros) или „Узери Халарис“ (Ouzeri Halaris), додека „Бек ту бек“ (Back to Back) е едно од оние места каде што се останува до доцна со коктели и музика. Парос воопшто не е евтина дестинација, па во сезона за оброк за двајца во подобрите ресторани лесно се трошат повеќе од 100 евра.

Покрај стандардната грчка понуда, вреди да се проба и гуна, традиционална сушена скуша, како и вината од локалните винарници што во последните години привлекуваат сè посериозна ено-публика.

Парикија/Tamara Kostić

Каде да се плива, отседне и сурфа

Како и поголемиот дел од Кикладите, и овој остров во лето често го зафаќа мелтеми, силен северен ветер што знае да ги промени плановите за капење, но затоа создава идеални услови за кајтсурфинг и едрење. Поради тоа локалците, кога ветерот ќе се засили, често ја избираат јужната или источната страна на островот, па добро е да имате предвид и алтернативи со помирни заливи и заштитени плажи.

 

Bloomber Adria/Marijana Avakumovic

Погледнете ја галеријата

Bloomber Adria/Marijana Avakumovic

Погледнете ја галеријата

Bloomber Adria/Marijana Avakumovic

Погледнете ја галеријата

Bloomber Adria/Marijana Avakumovic

Погледнете ја галеријата

Bloomber Adria/Marijana Avakumovic

Погледнете ја галеријата

 

Најубавите плажи се разликуваат по атмосферата. Колимбитрес е најпозната по необичните гранитни формации и тиркизното море, Санта Марија привлекува помлада публика и љубители на концептот со барови на плажа (beach bar), додека Голден Бич и Њу Голден Бич се центри за сурфање на ветер.

За ветровити денови одличен избор се плажите Пунда, Молос и Фарагас, а многумина тврдат дека токму Писо Ливади е идеален баланс меѓу уредена и автентична грчка плажа.

Оние што редовно летуваат на Парос потврдуваат дека во последните години цените на лежалките значително пораснале, особено на популарните плажи. Комплет за двајца со чадор најчесто чини од 50 до 70 евра дневно, додека во полуксузните локации во шпицот на сезоната цените надминуваат и 100 евра.

Мир и благосостојба - „Summer Senses Luxury Resort" | Tamara Kostić

Кога станува збор за сместување, оваа дестинација во последните години стана едно од клучните места на новиот кикладски луксуз. Меѓу најубавите адреси се издвојуваат „Парилио“ (Parilio), минималистички хотел во близината на Науса што често се појавува во светските магазини за патувања, како и „Козме“ (Cosme), ресорт сместен веднаш покрај брегот, познат по автентичната архитектура, приватниот клуб и впечатливиот базен во форма на полумесечина.

„Самер сенсес“ (Summer Senses Luxury Resort) привлекува гости со помирна атмосфера, голем спа-центар и елегантни апартмани над плажата Пунда, додека „Коув Парос“ (Cove Paros) комбинира дискретен бутик-луксуз со една од најдобрите локации во близина на малиот залив Агиои Анаргирои. Во текот на јули и август престојот во овие хотели чини од 250 до повеќе од 800 евра за ноќ.

Една од предностите на овој остров во Егејско Море е што за промена на атмосферата не ви треба нов лет или повеќечасовно патување со траект. Антипарос, оддалечен само неколку минути со локален брод, нуди побавно темпо и плажи што многумина ги сметаат за едни од најубавите во архипелагот. Во последните години стекна репутација на дестинација на славни личности во потрага по приватност и потивок облик на луксуз.

Како да се стигне до дестинацијата

Од Скопје до Парос нема авионска линија, но од Белград до Парос најлесно се стигнува преку Атина, до каде што српскиот национален авиопревозник „Ер Србија“ (Air Serbia) лета секојдневно. Од атинското пристаниште Пиреја кон островот тргнуваат траекти повеќепати дневно, а патувањето, во зависност од превозникот, трае меѓу два и пол и четири часа. Билетите за траект најчесто чинат од 50 до 80 евра во еден правец.

Друга опција е лет од Атина што трае помалку од еден час и често е попрактичен за патници што сакаат да избегнат трансфер до пристаништето и повеќечасовно пловење.

Во текот на летото интересна алтернатива е и Миконос, до кој од јуни до септември „Ер Србија“ лета двапати неделно. Оттаму до Парос со брза траектна линија се стигнува за помалку од еден час, што многумина го користат за комбинирање на двата бисери на Кикладите во едно патување.