„Анантара палм Дубаи“ (Anantara The Palm Dubai), луксузното одморалиште на еден од познатите градски уметнички острови во облик на дрвото палма, е блиску до продажба за 1,1 милијарда дирхами (280 милиони долари), тврдат лица запознаени со ова прашање.
Сопственикот на хотелот, „Севен тајдс“ (Seven Tides) со седиште во Обединетите Арапски Емирати (ОАЕ), преговара со „Грант торнтон“ (Grant Thornton LLP) за потенцијална продажба, велат изворите, барајќи да не бидат идентификувани бидејќи разговорите се приватни.
Одморалиштето „Анантара“ може да се пофали со приватна плажа од 400 метри, со поглед на Арапско Море, и низа водни патишта помеѓу речиси 300 соби и вили. Разговорите се во тек и нема сигурност дека договорот ќе се оствари, рекоа изворите, кои не го идентификуваа потенцијалниот купувач. Претставниците на „Севен тајдс“ не беа достапни за коментар, а од „Грант торнтон“ одбија да коментираат.
Разговорите доаѓаат во време на туристички бум во Дубаи, кој започна кога градот се појави како безбедно засолниште за време на пандемијата и оттогаш привлече голем број богати иселеници и туристи. Според компанијата што е советник за недвижности ЦБРЕ (CBRE Group Inc.), стапката на исполнетост на хотелите во Емиратите во првото тримесечје годинава во просек изнесува околу 83 отсто, а просечната дневна цена во тој период достигна 213,45 долари.
„Перформансите на имотите на плажа се подобрија многу брзо по пандемијата и тоа предизвикува значителен интерес за неколкуте хотели што им се достапни на инвеститорите. Ова е погодно време за сопствениците на имотот да излезат, бидејќи процените изгледаат привлечно поради најсилниот пазар што сме го имале во изминатите години“, рече во интервју Тајмур Кан, раководител на истражување на ЦБРЕ. „Инвеститорите очекуваат дека бројот на посетители на Дубаи би можел да се зголеми уште повеќе, бидејќи тие сè уште не се вратиле на нивото од 2019 година“, рече тој.
„Има многу мала понуда што доаѓа на пазарот во врвниот сегмент. Исто така остануваат уште неколку локации каде што инвеститорот може да изгради хотел со пет ѕвезди крај самата плажа“, рече Кан.
.webp){kind=icon}
