Со воведувањето нови чартер-летови до аеродромот „Св. Апостол Павле“, Охрид летово очекува рекорден број туристи. Освен организирани прошетки и посета на локални знаменитости, странските гости сè повеќе претпочитаат квалитетно поминат ден покрај езеро, особено оние што доаѓаат сега, во екот на сезоната, па истражувавме што мислат тие за плажите на охридското крајбрежје и кои според нив се најдобри.
„Не постои подобар начин да поминете летен ден во Охрид од уживање на една од многуте прекрасни плажи“, порачуваат Одри и Хери на нивниот популарен блог „Баџет севи травелерс“ (The Budget Savvy Travelers). Токму оваа американска брачна двојка од Чикаго, која пред една деценија одлучила да ги напушти своите сигурни работни места и комплетно да им се посвети на патувањата, објави список со 11 најдобри плажи во Охрид и околината, со корисни информации за секое од рангираните места.
МИА
Прва на нивната листа е Лабино, единствена плажа во најпознатиот македонски туристички центар што нема концесионер и нема шанкови и гласна музика. До неа најлесно може да се стигне со кајче, иако има и патеки, но поради големите стрмнини посетителите ги одбегнуваат.
„Малку подива и груба, плажата Лабино е местото каде што месното население за да избега од туристите оди на освежително капење во Охридско Езеро. Скриен под пешачките патеки кај црквата ’Свети Јован Канео’, овој дел од езерото е составен од мали заливи со камчиња, под сенка на високи дрвја. Патека во стариот градски парк ги носи посетителите од врвот на ридот до дното на езерото“, пишуваат во описот за оваа плажа сместена во подножјето на охридскиот рид.
Ова омилено капалиште на охриѓани се најде меѓу петте најдобри македонски плажи и на листата на познатиот блог за храна и патувања „Чејсинг д донки“ (Chasing the Donkey). Овде најдобро рангирана охридска плажа е Градиште, која е поврзана со истоимениот автокамп и се наоѓа во близината на историскиот локалитет Заливот на коските. Странците ја сакаат оваа впечатлива локација со четири заливи поради убавата сино-зелена вода и најчесто е нивен избор за еднодневен престој поради организираноста и многубројните дневни и ноќни забави што се одржуваат таму.
НУ Завод за заштита на спомениците
Листа со најдобри македонски плажи објави и „Трип-адвајзер“, а според корисниците на најголемата светска платформа за патувања без конкуренција е онаа во Трпејца или македонското Сен Тропе, како што милува да го нарекува месното население. Оваа мала селска плажа е посипана со ситен бел камен и се протега на само 200 метри. Водата е беспрекорно проѕирна и пријатна за капење. Туристите често ја посетуваат и поради убавото зајдисонце.
Уште едно омилено капалиште на странците е плажата Потпеш, која „Дискаверинг Маседониа“ ја опишува како шармантно затскриено место во близината на црквата „Свети Јован Канео“ што мора да се види во Охрид. Се наоѓа во стариот град, веднаш во подножјето на карпите, и лесно се стигнува до неа.
Последниве години сè поатрактивни за странските туристи се и уредените простори во околината на Струга. Две такви места, Версус и Аквариус, предводат на списокот со најубави македонски плажи објавен на „Инту Маседониа“ (Into Macedonia).
„Сместена на точката каде што Црн Дрим се влева во Охридско Езеро, Струга нуди возење со брод, прошетка покрај брегот на реката и едни од најдобро организираните мали плажи на охридското крајбрежје“, пишува овој туристички онлајн-водич за патувања креиран од група пасионирани истражувачи на Балканот.
Единствената омилена плажа што котира високо речиси на сите специјализирани сајтови за туризам, а не излегува на Охридско Езеро, е онаа во селото Долно Дупени, на брегот на Преспанско Езеро. Дупени бич е особено атрактивна поради пространоста и ситниот песок, па често ја нарекуваат и морска плажа.
Depositphotos
МИА
.webp){kind=icon}
