Патувањето на живописниот остров Санторини не може да се замисли без прошетка со магариња. Нуркањето, пак, со години е главна атракција за туристите во Египет. Но знаете ли дека во Охрид можете да го доживеете истиот адреналин?
На само 20 километри од градот, на надморска височина од 1.080 метри е сместено селото Куратица, едно од ретките во охридскиот крај што развива рурален туризам. Овде гостите возат четирицикли, но како посебно доживување им се нуди јавањето магариња низ убавите предели на Плакенска Планина.
Depositphotos
Станува збор за уникатно сафари, комбинација од јавање и пешачење. Патеката е долга четири километри, а патем се прави кратка пауза за кафе, со разгледување на околната дабова и букова шума и можност за собирање шумски плодови.
Турата завршува со ручек во селото. Освен што ќе пробате стара домашна ракија и ѓомлезе, овде ќе имате ретка можност да облечете традиционална селска носија, која жените ја пределе со помош на вретено, а потоа ја ткаеле на разбој. Ова патешествие, кое повремено е достапно и на „Трип-адвајзер“, трае од четири до шест часа.
Ако, пак, нуркањето е ваша страст, не мора да отпатувате дури до Египет. Сличен адреналин може да почувствувате кај историскиот локалитет Заливот на коските. „Овде имате ретка можност да се запознаете со праисторијата“, велат од нуркачкиот центар „Амфора“, кој организира разни програми за оние што се подготвени да го истражат дното на езерото.
Depositphotos
Кај Музејот на вода, кој се наоѓа во заливот, нуркачите имаат можност да поминат под дрвените куќички од кал и гранки каде што сè уште може да се видат камени секири стари околу 6.000 години, керамички плочки што служеле како тегови за рибарски мрежи, но и кружни камени блокови што се користеле за мелење жито.
Авантурата продолжува на длабочина од шест метри, каде што има колонија слатководни ракови, но може да се сретнат и јагули, школки и полжави. „Доколку се одлучите за нуркање на длабочина од 40 метри, ќе имате можност да се сретнете со колонии на ендемичен топчест сунѓер (Ochridaspongia rotunda)“, пишува во понудата.
НУ Завод за заштита на спомениците на културата и музеј/Охрид
Турата е приспособена за почетници, но треба да имате најмалку десет години. Програмата „Археолоџикал трај дајвинг“ (Archaeological Try Diving) е една од најпродаваните и чини околу 60 евра. За кандидатите се грижат професионални инструктори, а освен обука, пакетот вклучува подводни фотографии, видеоматеријал и сертификат. По нуркањето не се препорачува елевација над 2.500 метри н.в. и летање со авион во наредните 24 часа.
.webp){kind=icon}
