УЕФА ќе го бојкотира Светското првенство ако продолжат бизнис плановите на Инфантино

Унијата на европските фудбалски асоцијации (УЕФА) односно нејзините 55 членки се договориле да ги бојкотираат турнирите на Меѓународната фудбалска федерација (ФИФА) доколку претседателот Џани Инфантино продолжи со плановите за продажба на удели од Светското првенство на приватни инвеститори, според лице запознаено со ситуацијата.

Одлуката на моќната европска фудбалска организација била донесена на виртуелен итен состанок одржан во четвртокот, на кој се разговарало за контроверзниот предлог за продажба на удели. Бојкотот се очекува сериозно да ја поткопа стратегијата на Инфантино, бидејќи за нејзино спроведување е потребно одобрување од сите 211 членки на ФИФА до 19 септември, во спротивно би можеле да следуваат финансиски казни.

„Светското првенство не може да се третира како инвестициски производ“, соопшти УЕФА. „Ниту една репрезентација од земјите членки на УЕФА нема да учествува во натпреварување на ФИФА сè додека овие предлози се активни.“

Заканата најверојатно ќе ги запре плановите на ФИФА. Европа е дом на дел од најдобрите репрезентации во светот, меѓу кои и актуелниот светски шампион Шпанија. Земјите членки на УЕФА се истовремено и членки на ФИФА, што значи дека секоја од нив поединечно ќе гласа за предложените промени.

„Блумберг“ прв објави дека УЕФА разгледува можност за бојкот на натпреварувањата на ФИФА. Организацијата на европскиот фудбал претходно оваа недела остро реагираше на предлозите на ФИФА за привлекување приватни инвестиции.

Како одговор на плановите, УЕФА започна внатрешни разговори за тоа како клубовите и националните фудбалски федерации би можеле да ги бојкотираат натпреварувањата. Тоа би го опфатило Светското првенство, но и Светското клупско првенство, проширен турнир под покровителство на ФИФА кој би можел да стане конкурент на сопствената профитабилна Лига на шампиони на УЕФА.

Предлогот на ФИФА предвидува префрлање на најголемите комерцијални активности и операции поврзани со турнирите во нова компанија наречена ФФЕ (FIFA Forward Enterprise). Новиот субјект првично би бил проценет на околу 20 милијарди долари, а ФИФА би се обидела да обезбеди до 4,2 милијарди долари од надворешни инвеститори, додека истовремено би ја задржала целосната контрола преку мнозинско присуство во управниот одбор.

УЕФА и ФИФА, иако двете се непрофитни организации, долго време имаат затегнати односи, кои дополнително се влошија поради неодамнешното навлегување на ФИФА во областите што традиционално се под надлежност на УЕФА.

Проширеното Светско клупско првенство на ФИФА во 2025 година, со награден фонд од 1 милијарда долари што се дели меѓу 32 екипи, сега директно и пркоси на Лигата на шампиони на УЕФА - едно од финансиски највредните фудбалски натпреварувања.

Дополнително, синдикатите на фудбалерите изразија незадоволство поради оптоварениот календар, кој е последица на воведувањето нови натпреварувања. Бидејќи клубовите се одговорни за платите на играчите, тие активно бараат намалување на бројот на меѓународни турнири за да се намалат ризиците од замор и повреди кај фудбалерите.

ФИФА не одговори на барањето за коментар.