Извршниот директор на „Арчелор Митал“ вложува милијарда долари за купување на Селтикс

Адитја Митал, извршен директор на производителот на челик „Арчелор Митал“ (ArcelorMittal), инвестира една милијарда долари во купување на удел во тим на НБА-лигата, Бостон Селтикс, од Бил Чизхолм, според лице запознаено со трансакцијата.

Иако Чизхолм ќе остане најголем акционер, Митал ќе има значаен удел во тимот, рече лицето, кое побара да остане анонимно бидејќи договорот е приватен. Групацијата на Чизхолм првично се согласи да ги купи Селтикс во март од „Бостон Баскетбол Партнерс“ (Boston Basketball Partners) и тоа во два дела, при што првата трансакција го процени тимот на 6,1 милијарда долари, рекордна цена за контролна продажба на спортска франшиза.

Дури и со една милијарда долари од „Сикст Стрит Партнерс“, договорот не беше целосно финансиран. Но, обврската на Митал од еднА милијарда долари ѝ помага на групата на Чизхолм да го постигне тоа. Покрај Чизхолм и Митал, меѓу инвеститорите се и Роб Хејл и Брус А. Бил Џуниор.

Претставниците на Селтикс и Митал не одговорија веднаш на барањето за коментар.

Митал е син на Лакшми Митал, извршен претседател на „Арчелор Митал“, чие богатство се проценува на 23,9 милијарди долари, според индексот на милијардери на „Блумберг“. „Спортико“ претходно објави за ова вложување.