Колку вредат НБА-тимовите и кој може да ги плати?

Вредностите на франшизите во НБА достигнаа историски максимум, како што покажуваат неодамнешните продажби и новите пазарни процени. Најновиот пример доаѓа од Портланд, каде што Треил блејзерс (Portland Trail Blazers) официјално е ставен на продажба како наследство на коосновачот на „Мајкрософт“ (Microsoft), Пол Ален. Процесот на продажба го управува инвестициската банка „Ален и Ко.“ (Allen & Co.), со правна поддршка од „Хоган Ловелс“ (Hogan Lovells), што дополнително ги потврдува очекувањата дека цената ќе ги исполни, ако не и надмине, тековните пазарни проекции.

Според податоците на „Спортико“ (Sportico), Треил блејзерс се проценува на 3,6 милијарди долари, што го рангира клубот на 23-то место меѓу 30-те франшизи во НБА. Иако не се меѓу елитата во однос на вредноста, влегувањето на оваа франшиза на пазарот би можело да биде клучно за одредување на цените на потенцијалните тимови за проширување во Лас Вегас и Сиетл. Лигата, како што истакнуваат извори од ЕСПН (ESPN), сака да го почека исходот од оваа продажба за да ги обликува идните такси за проширување, кои би можеле да надминат четири милијарди долари по тим.

Вредностите на НБА-тимовите експлодираа во текот на изминатите десет години, а најновите примери само го потврдуваат трендот. Бостон Селтикс (Boston Celtics), една од најстарите и најтрофејни франшизи, беше продаден во март за рекордни 6,1 милијарда долари. Пред него, на крајот од 2023 година Далас Маверикс (Dallas Mavericks) му беше продаден на Марк Ласри за околу 3,5 милијарди долари, додека Финикс санс (Phoenix Suns), според „Спортико“, ги смени сопствениците за четири милијарди долари.

Кој е најевтиниот НБА-тим?

На дното од листата на вредности е Мемфис гризлис (Memphis Grizzlies), кој „Спортико“ го проценува на 3,06 милијарди долари. И покрај ова, дури и најевтиниот НБА-тим повеќе не е достапен за помалку од три милијарди долари, што јасно покажува во која сфера на сопственост се пресели лигата.

Ова зголемување на цените е делумно резултат на глобалната популарност на лигата, делумно на експлозијата на вредноста на медиумските права, но и на фактот дека НБА, за разлика од некои други спортски лиги, им нуди на инвеститорите директен влез во светот на американската поп-култура, забавата и пазарот на млади потрошувачи. Зголемувањето на интересот доаѓа и од светот на приватниот капитал и ризичните фондови, како и од технолошките милијардери, што е потврдено со влегувањето на Марк Кјубан, Стив Балмер и Мет Ишбија во сопственичките структури во последниве години.

„Вредностите на НБА-франшизите денес одразуваат повеќе од спортски перформанси. Тоа е билет за глобалниот бизнис за забава“, изјави за „Си-ен-би-си“ (CNBC) советникот за спортски инвестиции Сал Галатиото, додавајќи дека франшизите станале „статусен симбол за новата генерација милијардери“.

Кои се новите сопственици?

Кој може да си го дозволи тоа денес? Листата на потенцијални клиенти станува сè потесна. Станува збор за сопственици на фондови за приватен капитал, основачи на технолошки компании со портфолија од повеќе милијарди долари и меѓународни инвеститори со амбиции да го прошират своето деловно влијание на американскиот пазар. „НБА повеќе не е лига за локалните богаташи, таа е пазар за глобални играчи“, истакнува Галатиото.

Аналитичарите на „Блумберг“ проценуваат дека проширувањето на лигата на 32 екипи би можело да генерира повеќе од осум милијарди долари само во нови франшизни такси, што дополнително ќе го поттикне интересот за продажба на Треил блејзерс. Со оглед на тоа што Лас Вегас и Сиетл се главни кандидати, не треба да се исклучуваат потенцијални обиди на инвеститори од Азија и Блискиот Исток да влезат во НБА преку купување постојни франшизи.

Стабилноста како приоритет на лигата

Сепак, лигата останува претпазлива. Комесарот Адам Силвер неодамна изјави дека „НБА сака да ги одржи ексклузивноста и стабилноста во сопственичката структура“, што значи дека изборот на потенцијални купувачи би можел да биде построг од кога било досега.

Додека трае аукцијата за Портланд треил блејзерс, НБА влегува во нова фаза, фаза во која сопственоста на тимот значи повеќе од само победа на теренот - тоа е инвестиција во глобалната сцена на забава, технологија и на социјални медиуми. А билетот за тој свет сега чини најмалку три милијарди долари.