Наполи во 2021 година направи потег што во фудбалскиот бизнис звучеше речиси егзотично. Наместо соработка со традиционалните спортски гиганти како „Најк“ (Nike), „Адидас“ (Adidas) или „Пума“ (Puma), клубот за технички партнер го избра „Емпорио Армани“ (Emporio Armani) со неговата спортско-лежерна линија EA7. Четири години подоцна, соработката продолжува, а Наполи стана најрадикалниот пример дека модата влегува во фудбалот.
Најголемиот доказ за оваа промена е бројот на дресовите. Додека повеќето клубови лансираат три основни комплети (домаќински, гостински и трети), Наполи во првата сезона со „Армани“ претстави дури 13 различни изданија. Оттогаш двоцифрениот број на дресови стана практика. Клубот лансира нови дизајни во текот на целата година, за европски натпревари, специјални датуми и празници како Ноќта на вештерките.
Овој пристап потсетува на наративите во уличната и луксузната мода, со чести и тематски „дропови“ (drop), кампањи што го заменуваат традиционалниот модел на големи летни промоции. Секој нов дрес има ограничен рок на продажба и јасна приказна, создавајќи чувство на ексклузивност и постојана побарувачка.
Прочитај повеќе
Како Армани го скрои визуелниот идентитет на современиот спорт
Ретко некој толку длабоко ги поврзал модата и спортот, не само како спонзор туку и како архитект на визуелниот идентитет на натпреварите, клубовите и спортистите, како Џорџо Армани, италијанскиот моден гуру што нè напушти во четвртокот.
09.09.2025
Кој ги облекува фудбалските репрезентативци во регионот Адрија?
Деновиве во светот на спортот вниманието го привлече информацијата дека два глобални брендови – „Пума“ и „Адидас“ – размислуваат да станат нови спонзори на хрватската фудбалска репрезентација.
16.07.2025
Бразил со црвени дресови - идеја што предизвика политичка војна
Познатиот жолт дрес стана толку моќен симбол на конзервативната политика што многу левичари одбиваат да го носат.
08.05.2025
„Дроп-економија“ во фудбалот
Наполи стана пионер на „дроп-економијата“ во фудбалот. Наместо да го оствари целиот приход од дресовите во првите месеци од сезоната, клубот распоредува врвови на продажба низ целата година. За секој нов дизајн следуваат промотивна кампања, медиумски циклус и дополнителен прилив на средства. За навивачите тоа значи постојан новитет и притисок да купуваат повеќепати во текот на сезоната. За клубот тоа значи повисок просечен приход по навивач и позиционирање на брендот во премиум сегментот.
„Армани“ ги позиционираше дресовите во највисоката ценовна категорија, со оригинали што чинат околу 125 евра, без понуда на евтини реплики. Со ова Наполи свесно ја ограничи достапноста, но ја зголеми маржата по парче.
Купувачите на овие дресови не се само локални навивачи туку и глобални навивачи, колекционери и консументи на лајфстајл мода. Дресот веќе не е само спортски реквизит туку производ што стои рамо до рамо со модните колекции.
Ризици на производство и перцепција
Оваа стратегија не помина без контроверзии. Во италијанските медиуми се појавија гласини дека „Армани“ нема сопствени капацитети за производство на спортска опрема, па дресовите ги произведуваат фирми како „Онис свис“ (Onis Swiss) или дури и „Капа“ (Kappa), поранешен технички спонзор на Наполи. Клубот мораше да реагира и да ги демантира таквите информации, што ја покажува сложеноста на аутсорсинг-моделот кога модна куќа влегува во сегмент во кој нема искуство.
Сезоната 2025/2026 донесе уште еден доказ за логиката на двоцифрен број изданија. Новиот трет дрес, наречен „Кафе“ (Café), е замислен како омаж на неаполската култура на кафе. Минималистичкиот дизајн со поло-крагна и винтиџ детали е создаден како лајфстајл парче, кое е наменето за секојдневниот живот исто колку и за на стадион.
Овој дрес не е изолиран случај, туку дел од серија што вклучува и претходни специјални колекции инспирирани од Јапонија, Марадона и други мотиви. Секој дрес носи нова приказна, а двоцифрениот број на изданија стана правило, а не исклучок.
Наполи и „Армани“ заедно покажаа дека фудбалскиот дрес може да функционира како модна капсула. Двоцифрен број на изданија годишно ја менува економијата на „мерчови“ (merchandising) - повеќе дресови значат поголема комуникација, повеќе моменти за продажба и поголема монетизација од навивачката база.
Во ера кога клубовите сè повеќе се обидуваат да функционираат како лајфстајл брендови, Наполи отиде чекор понатаму. Фудбалот веќе не нуди само три основни комплети. Во Неапол дресовите излегуваат како модни колекции и секоја нова сезона носи цела палета на приказни.
.webp){kind=icon}
Во моментов нема коментари за веста. Биди прв да коментира...