Акциите на турскиот клуб „Галатасарај“ нагло пораснаа по победата над „Јувентус“

Акциите на турскиот фудбалски гигант „Галатасарај“ пораснаа за 4,8 отсто во средата наутро, по победата на клубот над италијанскиот великан „Јувентус“ во Лигата на шампионите на УЕФА.

Акциите на „Галатасарај“ (Galatasaray Sportif Sinai ve Ticari Yatirimlar AS), како што официјално се води спортскиот клуб, се тргуваа со раст од 3,2 отсто на ниво од 1,28 лири во 10:58 часот по локално време во Истанбул. Обемот на тргување беше осум пати поголем од просечниот дневен обем за овој дел од денот.

„Галатасарај“ во вторникот вечерта во Истанбул го совлада „Јувентус“ со 5-2, во првиот натпревар од нокаут-фазата во Лигата на шампионите. Резултатот значи дека клубот е во поволна позиција да избори пласман во осминафиналето на натпреварувањето за првпат по повеќе од една деценија. Реваншот ќе се игра во Италија следната недела.

Акциите на „Јувентус“ забележаа пад од 2,5 отсто кратко по отворањето на пазарот во Рим.

Дваесет и петкратниот шампион на Турција минатата година ја ангажираше нигериската ѕвезда Виктор Осимен од италијанскиот клуб „Наполи“ (SSC Napoli) за 75 милиони евра (85,7 милиони долари), што е најскапиот трансфер во историјата на турскиот фудбал.

Тренерот Окан Бурук на прес-конференцијата по натпреварот изјави дека за првпат турски тим постигнал пет гола против противник во ова престижно европско натпреварување.

„Ова е многу важно и вредно за нас. Но ништо не е завршено без вториот натпревар“, додаде тој. „Знаеме колку е добар нашиот ривал и знаеме колку ќе нè предизвика на свој терен.“