„Антропик“ поднесе доверлива пријава за ИПО во трката со „Опен еј-ај“

„Антропик“ (Anthropic PBC) доверливо достави нацрт-документација за јавна котација, потенцијално претркувајќи го долгогодишниот конкурент „Опен еј-ај“ (OpenAI) во трката за берзанско деби на Волстрит уште оваа есен.

„Бројот на акции што ќе се понудат и цената сè уште не се утврдени“, соопшти компанијата во блог пост во понеделник.

„Антропик“, некогаш сметан за аутсајдер во однос на „Опен еј-ај“, во последните месеци се истакна пред креаторот на ЧетГПТ (ChatGPT) на повеќе фронтови. Развивачот  на „Клод“ (Claude) собра 65 милијарди долари во рунда на финансирање минатата недела со проценка од 965 милијарди долари, вклучувајќи ја и инвестицијата, за прв пат надминувајќи ја вредноста на „Опен еј-ај“. Напредокот на „Антропик“ во кодирањето и способностите во кибер - безбедноста ги потресоа пазарите, а исто така привлече и нови деловни клиенти.

Со поднесувањето во понеделник, „Антропик“ е подготвен потенцијално да го победи „Опен еј-ај“ на јавниот пазар, поставувајќи се себеси за привлекување поголемо внимание и капитал од поголем број инвеститори. Се вели дека самиот „Опен еј-ај“ подготвува свое доверливо поднесување за ИПО во наредните недели и се стреми кон јавно деби некаде на есен, објави „Блумберг“ во мај.

Во интервју за „Си-ен-би-си“ во понеделник, главниот извршен директор на „Опен еј-ај“, Сем Алтман, ја ублажи реториката дека неговата фирма е во трка со „Антропик“ за ИПО. „Ќе го направиме тоа кога ќе сметаме дека ќе има смисла“, рече тој.

„Антропик“ и конкурентот „Опен еј-ај“ поголемиот дел од изминатата година се надмудруваа со низа лансирања на модели на вештачка интелигенција, насочени кон поедноставување на поширок спектар на професионални задачи - од кодирање преку финансиски услуги до здравствена заштита - со цел да привлечат повеќе деловни клиенти и да ги оправдаат нивните високи проценки.

Додека „Антропик“ неодамна се најде на насловните страници поради тоа што доживеа 80-кратно зголемување на годишните приходи, „Опен еј-ај“ ја преиспитува својата линија на производи и го менува лидерството, како и се соочува со нови сомнежи за својот раст по извештајот дека не достигнале одредени цели за внатрешни приходи и корисници. Како одговор, главниот финансиски директор на „Опен еј-ај“, Сара Фрајар, претходно изјави за „Блумберг“ дека компанијата ги исполнува своите цели и гледа „вертикален ѕид на побарувачка“ за своите производи.

„Антропик“, исто така, се соочува со некои неизвесности. Компанијата моментално е заглавена во правна битка со американската влада откако Пентагон ја прогласи за ризик во синџирот на снабдување, ознака што обично се резервира за странски ривали. „Антропик“ изјави дека потегот на администрацијата на Трамп би можел да загрози милијарди долари приходи.

Компанијата очекува да објави приходи од 10,9 милијарди долари за вториот квартал, што е повеќе од двојно зголемување во однос на претходниот тримесечен период, објави „Блумберг њуз“. „Антропик“ е исто така на пат за својот прв профитабилен квартал.

„Антропик“, „Опен еј-ај“ и „Спејс екс “ продолжуваат со плановите за котирање за да отворат моќен канал за потенцијално прибирање свеж капитал. Додека финансирањето на приватниот пазар драматично порасна, јавното котирање им дава на компаниите пристап до најширокиот можен опсег на инвеститори. Исто така, им дава можност на раните поддржувачи и вработени полесно да ги монетизираат своите удели.

Се очекува „Голдман Сакс“ , „Џеј Пи Морган“ и „Морган Стенли“ да бидат разгледани за клучни улоги при процедурите на  котирање на „Антропик“ и „Опен еј-ај“, велат луѓе запознаени со ова прашање.

 

-Со помош на Мајкл Хита.