„Епл“ ја претстави новата вештачка интелигенција, Сири добива напредни функции

„Епл“ ја претстави следната генерација на својата платформа за вештачка интелигенција (Apple Intelligence), најавувајќи значајни подобрувања на дигиталниот асистент Сири и нови функции кои треба да ѝ помогнат на компанијата да го засили своето присуство во сè поконкурентната трка во вештачката интелигенција (ВИ).

Новитетите беа претставени за време на годишната конференција за програмери Worldwide Developers Conference (WWDC), каде што шефот за софтвер во компанијата, Крег Федериги, изјави дека новиот систем ќе може многу подобро да го разбира контекстот на барањата на корисниците.

Според него, обновената Сири ќе биде „поинтелигентна, поупатена и поспособна“, а новата верзија, наречена Siri AI, првично ќе биде достапна на англиски јазик, по што постепено ќе се проширува и на други јазици.

Покрај Сири, „Епл“ најави и подобрувања на функциите Visual Intelligence, кои ќе овозможат подобро препознавање и анализирање на содржината што корисниците ја гледаат на своите уреди. Унапредени се и алатките за пишување, како и пребарувањето во оперативните системи, кое според компанијата ќе биде побрзо и попрецизно.

Претставувањето на новите ВИ можности доаѓа во важен момент за „Епл“, која се соочува со притисок од инвеститорите и конкуренцијата да покаже дека може да остане релевантна во ерата на вештачката интелигенција. Кога компанијата ја претстави платформата Apple Intelligence пред две години, дел од најавените функции доцнеа со испорака или не успеаја да ги достигнат можностите што веќе ги нудеа конкурентите.

Токму затоа надградбата на Сири се смета за еден од најважните чекори во обидот на компанијата да го забрза развојот на своите ВИ производи. Според претходни информации, новата Сири ќе добие посебна апликација и интерфејс што повеќе ќе потсетува на современите четботови.

За време на презентацијата, Федериги нагласи дека новите софтверски надградби се фокусирани на три клучни области - вештачка интелигенција, перформанси и безбедност. Компанијата најави побрзо вчитување на апликации и фотографии, како и нови безбедносни механизми за заштита на децата, кои ќе овозможат подобра контрола на времето поминато пред екран и спречување пристап до несоодветни содржини.

Во рамки на настанот беше откриено и името на следната верзија на оперативниот систем за Mac компјутерите, која ќе се вика macOS Golden Gate.

„Епл“ исто така направи дополнителни измени на дизајнерскиот концепт Liquid Glass, претставен минатата година. Корисниците ќе добијат можност самостојно да го прилагодуваат интензитетот на визуелниот ефект, откако дел од нив се пожалија дека текстот понекогаш е потешко читлив.

И покрај големите најави, реакцијата на инвеститорите беше умерена. Акциите на компанијата краткотрајно пораснаа за повеќе од три проценти за време на презентацијата, но добивката брзо се намали, што укажува дека пазарот сè уште очекува поконкретни резултати од ВИ стратегијата на „Епл“.