Тужба против бензински пумпи од Калифорнија – со помош на вештачка интелигенција ги „пумпале“ цените

Група потрошувачи од Калифорнија во тужба тврдат дека сопствениците на бензински станици, вклучувајќи ги „Волмарт“ (Walmart Inc.), „Маратон Петролеум“ (Marathon Petroleum Corp.), „БП“ (BP Plc.) и „7-Елевен“ (7-Eleven Inc.), користат вештачка интелигенција за нелегално манипулирање со цените на бензинските пумпи во државата која веќе има највисоки цени во САД.

Компаниите, кои управуваат со повеќе од 1.700 бензински пумпи низ целата држава, користат алатка со вештачка интелигенција од „Калибрејт Фјуел Системс“ (Kalibrate Fuel Systems) која автоматски ги прилагодува цените врз основа на доверливи податоци во време кога бензинот надмина 7 долари за галон (околу 3,9 литри) во некои области, според тужбата поднесена во понеделник до федералниот суд во Сакраменто.

Користејќи го алгоритмот, сопствениците на пумпите го поскапеле бензинот и до 22 центи за галон, а дизелот за 33 центи, и покрај веќе високите цени предизвикани од војната на САД со Иран, тврдат тужителите. Секој дополнителен цент ги чини возачите во Калифорнија околу 134 милиони долари годишно, според тужбата.

Минатиот месец, калифорнискиот надзорен орган за гориво издаде судски покани до некои сопственици на пумпи поради високите цени.

Тужбата е меѓу првите поднесени според AB 325, закон што Калифорнија го донесе минатата година, со кој се забранува употребата на споделени алгоритми за одредување цени. Со неа се бара отштета за возачите во државата кои преплатиле за гориво според законот за антимонополска политика на Калифорнија.

Портпаролите на „Волмарт“, „Маратон“, „БП“, „7-Елевен“ и „Калибрејт“ не одговорија веднаш на мејлот во која се бара коментар за тужбата.