Секоја седма компанија во ЕУ користи ВИ, Словенија е лидер во регионот

Во 2024 година 13,5 проценти од компаниите во ЕУ со 10 или повеќе вработени користеле технологии за вештачка интелигенција (ВИ) за водење на нивниот бизнис. Статистичките податоци на „Евростат“ покажуваат дека тоа е солиден раст во однос на осум отсто од компаниите што интегрирале ВИ во своето работење во 2023 година.

Највисоко учество на овие компании во вкупниот број има во Данска (27,6 отсто), Шведска (25,1 отсто) и Белгија (24,7 проценти). На другиот крај се Романија (3,1 отсто), Полска (5,9 отсто) и Бугарија (6,5 проценти).

 

 

Во извештајот од „Евростат“ се забележува дека кај сите земји на ЕУ има зголемување на уделот на претпријатија што користат технологии за вештачка интелигенција во споредба со 2023 година, при што Шведска забележала најголем пораст од 14,7 процентни поени (п.п.), а следуваат Данска (+12,4 п.п.) и Белгија (+10,9 п.п.). Спротивно на тоа, скромни зголемувања се забележани во Португалија (+0,8 п.п.), Романија (+1,6 п.п.) и во Шпанија (+2,1 п.п.).

„Претпријатијата продолжија да прифаќаат различни технологии за вештачка интелигенција за да ги подобрат своите операции. Најкористена технологија за вештачка интелигенција беше вршењето анализа на пишаниот јазик (препознавање текст). Ова го усвоиле 6,9 проценти од претпријатијата, што е за четири процентни поени повеќе од 2023 година“, пишува во соопштението од „Евростат“.

Depositphotos

Според европската статистичка канцеларија, втората најкористена технологија за вештачка интелигенција е генерирањето пишан или говорен јазик (генерирање природен јазик), користено од 5,4 отсто од претпријатијата (+3,3 п.п. во споредба со 2023 година). Потоа следува можноста за конвертирање на говорниот јазик во машински читлив формат (препознавање говор), користено од 4,8 проценти претпријатија, односно за 2,2 п.п. повеќе отколку во 2023 година.

Словенија е лидер во регионот, Турција е единствена во која употребата на ВИ се намалува

Словенија е државата што котира одлично на табелата на ЕУ во однос на процентуалното користење на ВИ од страна на компаниите. Таа е седмата земја на листата, со една петтина поточно 20,89 отсто компании што користат вакви технологии. И напредокот е особено воодушевувачки, бидејќи бројката за една година е удвоена. Во 2023 година ВИ во работата имплементирале 11,37 отсто од фирмите.

Евростат

Сите други држави се далеку подолу во користењето ВИ во бизнисот. Хрватска има 11,76 отсто такви компании, Грција 9,81 отсто, Црна Гора 7,91 отсто, Србија 6,95 проценти, Бугарија 6,47, а Босна и Херцеговина 6,36 отсто. „Евростат“ не располага со ваков тип информации за Македонија и за Албанија.

Интересен е податокот за Турција. Оваа држава е на дното од табелата заедно со Романија, која е најлоша земја во поглед на употреба на ВИ во фирмите. Во Романија процентот е 3,07, а во Турција 4,42. Но невообичаеното е што Турција е единствената држава во која процентот се намалил и од 5,51 отсто во 2023-та паднал на 4,42 проценти во 2024 година.

 

Во моментов нема коментари за веста. Биди прв да коментира...

Остави коментар