Возбудата околу вештачката интелигенција (ВИ) во Давос беше дополнително засилена од заедничкиот потфат вреден 500 милијарди долари меѓу „Софтбанк“ (Softbank), „Опен еј-ај“ (OpenAI) и „Оркл“ (Oracle), кој беше најавен на настан со претседателот Доналд Трамп неделава во Вашингтон. Пристапот на САД треба да биде „аларм за будење“ за Европа да се организира и да инвестира во овој сектор, изјави извршниот директор на „Просус“ (Prosus), Фабрисио Блоиси, за телевизијата „Блумберг“.
Блоиси посочи дека неговата компанија, која инвестира во технологии, располага со приближно 20 милијарди долари за трошење и е подготвена да се прошири низ Европа.
Блоиси ги води „Просус“, со седиште во Амстердам, и неговата јужноафриканска матична компанија „Насперс“ (Naspers Ltd.), кои веќе имаат значителни удели во европски компании, вклучувајќи ја и германската „Деливери хиро“ (Delivery Hero SE). Сепак, поголемиот дел од нивните зделки во последните месеци бил насочен кон пазари со историски повисок раст, како иницијалната јавна понуда во Индија и зделка од 1,7 милијарда долари за туристичка агенција во Бразил.
Минатата година Блоиси беше унапреден во извршен директор и му беше доверено да пронајде нови извори на раст, откако раната инвестиција во кинескиот гигант за видеоигри „Тенсент“ (Tencent Holdings Ltd.) доминираше во книговодствените извештаи на компанијата и ја измести нејзината пазарна вредност. Тој изјави дека „Просус“ е подготвен да инвестира поблиску до своето седиште, а потезите на претседателот Доналд Трамп за правење на САД суперсила во сферата на вештачката интелигенција ги нарече „аларм за будење“ за Европа.
„Во Давос минатата година главната тема беше како да избегнеме да се движиме пребрзо во поглед на вештачката интелигенција“, изјави тој. „Администрацијата на Трамп го промени наративот во ‘ние ќе се движиме побрзо од било кој друг’“.
„Просус“ е заинтересиран за пронаоѓање партнери за инфраструктура за вештачката интелигенција во Европа“, додаде Блоиси.
Преку „Насперс“, „Просус“ направи голема инвестиција во кинескиот производител на игри „Тенсент“ во 2001 година, кога плати 34 милиони долари за 50 отсто удел. Денес компанијата поседува околу една четвртина од „Тенсент“, чија вкупна пазарна вредност изнесува околу 450 милијарди долари.
„Играта на ’Просус’ не е Кина“, изјави Блоиси. „Играта на ’Просус’ е како акционер на кинеска компанија. Но таму каде што инвестираме и каде што сакаме да растеме се Европа, Индија, Латинска Америка, Африка, и таму вложуваме“.
Националниот суверенитет станува важен аспект во развојот на ВИ, при што Индија се очекува да има корист од овој тренд, според претседателката на „ХЦЛТек“ (HCLTech), Рошни Надар Малхотра.
Оперативната директорка на „Гугл дипмајнд“ (Google DeepMind), Лила Ибрахим, изјави дека луѓето ќе треба „сега да почнат да експериментираат со ВИ“ за да развијат нови вештини. Контекстот овде е дека оваа технологија ќе предизвика масовни промени на работните места.
Но можеби преквалификацијата нема да биде толку неопходна, со оглед на тоа што извршниот директор на „Антропик“ (Anthropic), Дарио Амодеи, предвидува блиска иднина во која ВИ на ниво на генијалност ќе може самостојно да создава свои роботи.
.webp){kind=icon}
