Вештачката интелигенција е златна кокошка за производителите на електроопрема

Растечката потреба и побарувачка за енергетска ефикасност, попаметни мрежи и пониски оперативни трошоци ја поттикнуваат трансформацијата во индустријата за електрична опрема. Теоретски гледано, вештачката интелигенција би била мозокот што управува со различни елементи на мрежата, односно поврзани електрични уреди.

Пазарот на капитал ја цени примената на вештачката интелигенција

Користењето и развојот на вештачката интелигенција се голем плус за инвеститорите. За наша набљудувана група беа издвоени компании од секторот за производство на електрична опрема што се пионери во примената на вештачката интелигенција, односно имаат директни придобивки од примената на вештачката интелигенција (тие се главни доставувачи на инфраструктурата на центрите за податоци). Компаниите што произведуваат електрична опрема веќе се во период на своевиден бум на побарувачката, поради зелената транзиција. Како што е пишувавме во анализата „Зошто зелената транзиција бара толку многу трансформатори“, зелената транзиција бара сè повеќе производи за електрична опрема, особено трансформатори, што создаде нерамнотежа на побарувачката и понудата. Центрите за податоци за вештачка интелигенција брзо станаа генератори на приходи за производителите на електрична опрема, имајќи предвид дека се енергетски интензивни и сложени.

Производителите на електрична опрема се клучни во синџирот на снабдување на центрите за ВИ

Центарот за податоци бара широк опсег на компоненти – трансформатори, разводни уреди, прекинувачи, собирници, системи за ладење, суперкондензатори, батерии, генератори и системи за следење. За контекст, корисно е овде да се разложи синџирот на снабдување на центарот за податоци. Дизајнот и изградбата на центрите за податоци (и сродните решенија и услуги) најчесто ги вршат производители на електрична опрема, додека специјализираниот хардвер (графички картички, процесори и меморија) го обезбедуваат компании како „Енвидија“, „Интел“, АМД и „Циско“. Операторите најчесто се технолошки компании како што се „Амазон бев сервисис“, „Гугл клауд“ и „Мајкрософт Азур“. Клиентелата е сѐ поширока и се состои од компании и институции што треба да манипулираат со големи бази на податоци. Јасно е дека производителите на електрична опрема играат клучна улога во овој синџир на снабдување. Во секој случај, производителите на електрична опрема што го опслужуваат пазарот на вештачка интелигенција растат побрзо од поширокиот индекс – S&P 1200 Global Industrials.

„Вертив“ покажува највисока стапка на раст на цената на акциите во набљудуваниот период – дури 74,2 отсто (значително повисока од поширокиот индекс, кој порасна за 15,9 отсто во истиот период). Стратегиски гледано, „Вертив“ е совршено позициониран да профитира од порастот на побарувачката за инфраструктура за вештачка интелигенција. Компанијата нуди решенија за напојување и ладење за центрите за податоци за вештачка интелигенција. Растот на цената на акциите е поддржан и од добрите финансиски резултати – 26 отсто зголемување на нето-приходите од продажба во четвртиот квартал од 2024 година и 77 отсто зголемување на заработката по акција.

„Итон“ е единствената акција што бележи стапка на раст под индексот S&P 1200, поточно 12 отсто во набљудуваниот период. Стапките на раст на „Итон“ беа над стапките на раст на поширокиот индекс во текот на годината, но на почетокот на 2025 година, со појавата на „Дипсик“, инвеститорите ја преиспитаа побарувачката за микрочипови и класични енергетски интензивни центри за податоци. Следуваше голема распродажба во поврзаните сектори, а беа погодени и акциите на „Итон“. Вреди да се напомене дека „Вертив“, исто така, доживеа остар пад на цената на акциите во тој период (од слични причини), но ги задржа стапките на раст на цената на акциите поради поцврстите основи и посилниот фокус на сегментот на пазарот на вештачка интелигенција.

Европските играчи „Сименс“ и АББ уживаа солидни стапки на раст на цената на акциите во 2025 година. Во набљудуваниот период тие забележаа стапки на раст од 33 и 31 отсто, соодветно. Нето-добивката се зголеми за 52 отсто, што исто така го зголеми приносот на вложениот капитал за 6,7 процентни поени на 29,7 отсто. Профитабилноста и приносите во овој период беа значително зголемени со продажбата на ентитетот „иномотикс“, кој е специјализиран за големи мотори и погони. „Иномотикс“ им беше продаден на партнерите на „КЦС Капитал“ како дел од иницијативата на „Сименс“ да се фокусира на бизниси со висока маржа и помалку интензивен капитал – автоматизација и паметна инфраструктура. Кога ќе се повлече крајната линија, „Сименс“ со тој потег заработи 2,1 милијарди евра (по оданочување), а заработката по акција скокна за 52 отсто.

И АББ бележи стабилни резултати – нарачките се зголемени за 1 отсто, ЕБИТДА е зголемена за 10 отсто (со рекордна маржа од 18,1 отсто). Ентузијазмот на акционерите и инвеститорите дополнително го поттикна откупот на сопствените акции. За цела 2025 година, АББ проектира дополнителен раст на приходите со средно едноцифрен број, поттикнат од електрификацијата и автоматизацијата.

Кога ќе се повлече линијата, критериумите за успех за производителите на електрична опрема станаа кристално јасни – солидни финансии и фокус на новите технологии – обновливи извори на енергија и центри за податоци, а уште попожелно е – интеграција на двете. Во примерот на „Вертив“, може да се види дека инвеститорите се подготвени да платат премија за акции на компанија што има посилен фокус на центрите за податоци и сегментот на пазарот на вештачка интелигенција.

Идни перспективи

Истражувањето на целосниот потенцијал на вештачката интелигенција сè уште е тест во мрак – многу останува неистражено. На пример, целосно самостојно управување со електрични мрежи и инфраструктура, како и системите за самолекување. ВИ може да се користи и на страната на потрошувачите и да обезбеди директен увид во цените на енергијата, како и во потрошувачката. Вештачката интелигенција може да се вгради и за време на процесот на дизајнирање, за да помогне во дизајнирањето поефикасни конвертори, прекинувачи, како и во развојот на материјали – спроводливи, изолациски и други решенија. Развојот на квантното пресметување овозможува обработка на огромни бази на податоци од енергетските системи. Пресметките на ова ниво ќе овозможат ултрапрецизно предвидување на побарувачката на енергија со минимален енергетски отпад. Според најконзервативната процена, очекуваме дека играчите што влегле порано на ова поле може да се надеваат на посилни вреднувања. Тие исто така имаат здрава основа за понатамошен раст на приходите во обновливите извори на енергија и центрите за податоци.

Во моментов нема коментари за веста. Биди прв да коментира...

Остави коментар