Доаѓа подновената асистентка Алекса со вештачка интелигенција

„Амазон“ (Amazon.com. Inc) наесен ќе ги лансира придружните уреди за верзијата со вештачка интелигенција на гласовната асистентка Алекса (Alexa), изјави главниот извршен директор Енди Џејси во интервју за телевизијата „Блумберг“.

Уредите и сегашниот хардвер, кои наскоро ќе го добијат ажурираниот софтвер Алекса+ (Alexa+), ќе одат малку подалеку од одговарање на тривијални прашања и ќе им помогнат на потрошувачите да ги завршат задачите, како што е ангажирање некого да поправи рерна, рече тој вчера. Џејси неделава престојуваше во Њујорк, каде што ја претстави новата Алекса.

Алекса во последните години беше засенета од бранот четботови со вештачка интелигенција, вклучувајќи го и пионерскиот ЧетГПТ (ChatGPT) од „Опен еј-ај“ (OpenAI). Рестартирањето на гласовниот асистент на „Амазон“ е обид повторно да се разгори ентузијазмот на потрошувачите и да се генерираат приходи од претплати, онлајн шопинг и други бизниси.

„Мислам дека постои одржлив бизнис-модел“, рече Џеси за старо-новиот фокус на „Амазон“ за платформата Алекса.

Енди Џејси, главен извршен директор на „Амазон“ Bloomberg Mercury

 

Ремонтот на Алекса, најважната франшиза за електроника на „Амазон“, траеше подолго отколку што компанијата првично се надеваше бидејќи инженерите работеа на внесување вештачка интелигенција во софтверот, кој првично не беше така дизајниран.

„Амазон“ ќе почне да им наплаќа на клиентите на Алекса откако новата Алекса+ ќе почне да излегува следниот месец. Корисниците што ги сакаат најновите можности ќе треба да плаќаат по 19,99 долари месечно. Членовите на програмата „Амазон прајм“ (Amazon Prime), која чини 139 долари годишно, ќе го добијат ажурирањето бесплатно.

Во опсежното интервју Џејси рече дека предложеното правило од ерата на Бајден, со кое ќе се ограничи извозот на чипови со вештачка интелигенција во нации како Израел и Обединетите Арапски Емирати, може да има несакани последици. „Без промени во предложеното правило во основа ќе се откажеме од тој бизнис“, рече тој.

Џејси рече дека ограничувањата на напојувањата и недостигот од чипови продолжуваат да го ограничуваат растот на „Амазон“ во одделот за компјутерски облак. Тој рече дека администрацијата на Трамп е посветена да помогне во решавањето на проблемот. „Тие ги разбираат ограничувањата што ги има врз економијата“, рече тој.

Извршниот директор на „Амазон“ исто така рече дека е охрабрен што тимот на Трамп „се грижи за тоа што мисли бизнисот“ и е свесен за предизвиците што го ограничуваат развојот на вештачката интелигенција. Џејси рече дека разговарал со Трамп, но не откри што разговарале.

 

Во моментов нема коментари за веста. Биди прв да коментира...

Остави коментар