Неочекуван потег на „Софтбанк“ - ги продаде сите свои акции во „Енвидија“ за 5,8 милијарди долари

„Софтбанк“ (SoftBank Group Corp.) ги продаде сите акции што ги поседуваше во „Енвидија“ (Nvidia), инкасирајќи 5,8 милијарди долари пред новиот бран планирани вложувања на основачот Масајоши Сон, насочени кон создавање сопствена мрежа на компании што ќе го поддржуваат развојот на вештачката интелигенција.

Компанијата со седиште во Токио ја зголеми својата инвестиција во „Енвидија“ на околу 3 милијарди долари до крајот на март. Таа инвестиција, заедно со добивките од инвестициската единица „Вижн фонд“ (Vision Fund), ѝ помогна на „Софтбанк“ да прикаже нето-добивка од 2,5 билиони јени (16,2 милијарди долари) во вториот фискален квартал – далеку над просечната процена на аналитичарите од 418,2 милијарди јени.

Во вторникот, компанијата исто така најави поделба на акциите во сооднос 4 спрема 1, што ќе стапи во сила на 1 јануари.

Компанијата на Сон сега располага со портфолио во кое се наоѓаат некои од најпосакуваните имиња во областа на ВИ: „Опен еј-ај“ (OpenAI) и „Оракл“ (Oracle Corp.). Овие вложувања значително ги зголемија хартиите од вредност на „Софтбанк“ и придонесоа за раст на акциите од 78 отсто во трите месеци до крајот на септември – најдобар квартален резултат уште од декември 2005 година.

Bloomberg

Бројот на инвестиции од кои „Софтбанк“ успешно ја враќа вложената вредност се зголемува, напиша аналитичарот на „Ситигруп“ (Citigroup), Кеиичи Јонешима, во анализа објавена пред извештајот за заработката. „Затоа ги зголемуваме нашите прогнози“, наведе тој, поставувајќи целна цена за акцијата на „Софтбанк“ од 27.100 јени, поврзувајќи ги пресметките со проценетата вредност на „Опен еј-ај“ и претпоставувајќи дека во иднина таа ќе се движи меѓу 500 милијарди и еден билион долари за операторот на ЧетГПТ.

Основачот на „Софтбанк“, 68-годишниот Масајоши Сон, агресивно се обидува да го искористи подемот на инвестициите во ВИ и полупроводници, иако ги намалува другите вложувања. Неговата амбиција го поттикна стартот на иницијативи како проектот за дата-центри „Старгејт“ (Stargate) и планираната инвестиција од 30 милијарди долари во „Опен еј-ај“. Сон исто така преговара со ТСМЦ (Taiwan Semiconductor Manufacturing Co.) и други партнери за учество во проект за изградба на центар за производство на ВИ вреден еден билион долари во Аризона.

„Софтбанк“ дури разгледувала можност и за преземање на американскиот производител на чипови „Марвел“ (Marvell Technology Inc.) претходно оваа година.

Bloomberg Mercury

Предизвик за „Софтбанк“ ќе биде да го балансира финансирањето зад новите инвестиции, меѓу кои се околу 20 милијарди долари за „Опен еј-ај“ и 6,5 милијарди долари за планираното преземање на дизајнерот на чипови „Ампeр компјутинг“ (Ampere Computing LLC). Сепак, и понатаму постојат грижи за високите процени што ги одржуваат ВИ-компаниите и нивните капитални трошоци, како и за тоа кој на крајот ќе има најголема корист од големите дата-центри и другата инфраструктура што е во изградба.

„Едноставниот потег беше да се купи акцијата на ‘Софтбанк’ за евтин пристап до уделите во ‘Арм’ (Arm) и поширокиот ВИ и технолошки сектор. Таа идеја се покажа повеќе од успешна, акцијата повеќе од двојно ја зголеми вредноста, далеку надминувајќи го умерениот раст на нето-вредноста на средствата“, се наведува во анализата на „Финимајз рисрч“ (Finimize Research) објавена на „Смарткарма“ (Smartkarma) пред извештајот за заработката.

„Но сега попустот е речиси целосно затворен, па ‘Софтбанк’ повеќе не претставува ‘евтин’ начин за вложување. Оттука, можеби е вистински момент да се продаде и да се соберат профитите“, се додава во анализата.