„Нетфликс“ ја купи фирмата за вештачка интелигенција на Бен Афлек за 600 милиони долари

Бен Афлек со години го критикуваше „Нетфликс“ за производство на огромни количини филмови како на лента, ставајќи го обемот пред вредноста на занаетчиството. Потоа, тој ѝ продаде на истата компанија вештачка интелигенција што можеше да ја направи таа лента уште побрза, за 600 милиони долари.

Ова не е иронија, туку сигнал: „Нетфликс“ се обидува да го реши својот најголем проблем со ова - како да произведе повеќе содржина без пад на визуелниот квалитет. Вредноста во индустријата затоа се префрла кон алатките за вештачка интелигенција кои контролираат како изгледа филмот, а не само колку брзо се создава.

Актерот кој тивко изгради компанија за вештачка интелигенција

Во 2022 година, без никаква публицитет, Афлек ја основа „Интерпозитив“ (InterPositive), компанија со само 16 вработени, со поддршка на инвестицискиот фонд „Ред Бирд Капитал“ (RedBird Capital Partners).

Со оваа аквизиција, „Нетфликс“ ефикасно плаќа речиси 38 милиони долари по вработен на „Интерпозитив“. Не купува софтвер, туку купува контрола на квалитетот. За компанија која има репутација за години на производство на визуелно „евтина“ содржина, ова е инвестиција во стандард, а не само во брзина.

Тие не изградија систем што генерира филмови од ништо. Тие создадоа нешто многу покорисно: алатка што учи од суровиот материјал од продукцијата, а потоа му помага на режисерот во постпродукцијата да ги исправи грешките во континуитетот, да го приспособи осветлувањето на сцената и да го забрза додавањето на визуелни ефекти (од англиски: Visual Effects – VFX или дигитални промени на сликата).

„Не станува збор за пишување текст и добивање филм“, рече Афлек во видео објавено од „Нетфликс“ по повод аквизицијата.

Режисерот Дејвид Финчер, познат по својата опсесивна визуелна прецизност, беше меѓу првите што ја користеа алатката на претстојниот филм со Бред Пит.

„Нетлфикс“ официјално го купи „Интерпозитив“ на 5 март 2026 година. Цената од 600 милиони долари ја прави оваа аквизиција втора најголема во историјата на стримерот (streamer - платформа за дистрибуција на видео содржина преку Интернет), веднаш зад купувањето на правата за делата на Роалд Дал за околу 700 милиони долари.

Вистинската сума во готово беше помала, а остатокот беше поврзан со исполнување на деловните цели. Афлек останува советник на компанијата. „Нетфликс“ не е единствениот што оди по тој пат. „Амазон“ гради свои тимови за вештачка интелигенција во филмската и ТВ продукција, додека „Дизни“ експериментира со алатки на „Опен еј-ај“ (OpenAI).

По неуспешниот обид да го преземе „Ворнер Брос“ за 72 милијарди долари, „Нетфликс“ ја промени стратегијата. Наместо да купи студио, сега купува алатки што го контролираат самиот процес на производство.

Регионот Адрија помеѓу можноста и загубата на дел од индустријата

Хрватска и Србија не привлекоа меѓународни продукции случајно. Хрватска нуди поврат од 25 проценти на квалификуваните трошоци за производство, што доведе до проекти кои се движат од „Игра на троновите“ во Дубровник до „Војна на ѕвездите“ на Јадранскиот брег.

Во последниве години, Србија се профилираше како регионален центар за анимација, VFX и постпродукција за европски и американски продукции. Студијата во Белград работат на проекти за клиенти од „Ворнер“ до „Амазон“.

Но, токму овој дел од индустријата сега е првата цел на автоматизацијата.

Постпродукцијата - корекција на бои, корекции на грешки во континуитетот, приспособувања на осветлувањето и забрзување на процесот на VFX - сочинува до една третина од буџетот на филмот. Токму овие задачи ги презема „Интерпозитив“ сега со алгоритми.

Ова значи дека дел од работата што ја работат регионалните студија денес постепено ќе се префрли директно во софтверот контролиран од платформи како „Нетфликс“.

 

Најизложени се компаниите што ја префрлаат постпродукцијата и VFX на надворешни изведувачи. Ако алатка како Интерпозитив навистина функционира како што тврди „Нетфликс“, тој бизнис модел во регионот ќе  престане да биде конкурентен во рок од неколку години. Сепак, постои и друга страна на оваа промена.

Ако вештачката интелигенција доволно ги намали трошоците за постпродукција, вкупното производство на содржини може дополнително да се зголеми. Повеќе серии и филмови значат поголема побарувачка за локации за снимање, теренски екипи и локални продукциски услуги.

Со други зборови, еден регион може да изгуби дел од работата во постпродукцијата, но во исто време да добие повеќе снимање.

Клучното прашање за регионалните студија затоа повеќе не е брзината на извршување на задачите. Вредноста се префрла кон компании кои го разбираат целиот процес на производство и можат да интегрираат алатки за вештачка интелигенција во сопствената работа.

Кој и да остане само давател на постпродукциски услуги ризикува да биде заменет од софтвер. Бен Афлек ја препозна таа логика порано од многумина во индустријата и ја продаде таа предност на „Нетфликс“ за 600 милиони долари.