Стануваат „сертифицирани крипто-експерти“ за 11 часа и 229 долари

За да ги положите испитите за овластен финансиски аналитичар и да ги ставите буквите ЦФА (CFA) во вашата биографија, се препорачуваат најмалку 900 часа студирање. Истовремено, учење од 300 до 400 часа се советува за да се полага испитот за овластен јавен сметководител, кој обично го полагаат кандидатите кои имаат завршено додипломски студии по предметот. Меѓутоа, за да станете „сертифициран експерт за криптовалути“ или ЦЦЕ (CCE) се‘ што ви треба се 229 долари и време за 11 часа онлајн курсеви понудени од таканаречениот Совет за блокчејн. Ако тоа време ви е премногу може да добиете „сертификат за криптовалути и блокчејн“ на друго место со посета на онлајн курс кој трае само четири часа и положување на тест од 20 прашања за надомест од 795 долари.

Недостигот од широко призната професионална акредитација во индустријата за криптовалути остави вакуум што различни организации се обидуваат да го пополнат, а реинкарнацијата на биткоинот кој достигна рекорди оваа година предизвикува се поголем интерес за обуки. Сепак, како и со многу теми кои вклучуваат крипто, постојат прашања за тоа што нудат ваквите курсеви и дали воопшто вреди да се инвестира во вакви обуки.

Кон ширењето на онлајн програмите за крипто-сертификација придонесува тоа што многу универзитети стојат зад кривата кога станува збор за нудење доволно предмети по оваа тема, според професорот за финансии на Универзитетот Дјук, Кембел Харви.

„Многумина ја видоа оваа празнина и нудат ‚сертификати‘“, вели Харви, кој ги проучува пазарите на дигитални средства. „Сепак, студентите треба да бидат свесни дека некои од овие сертификати се само трикови за грабање пари. Купувачи внимавајте“.

На нашите мејлови до Советот за блокчејн со барање коментар за оваа проблематика не добивме одговори, а повиците на нивниот телефонски број останаа без одговор. АЦАМС (ACAMS), која нуди сертификат за криптовалути и блокчејн од 795 долари, не врати на нашите мејлови со барање за коментар.

Програмата за крипто-едукација е директно поврзана со наводна измама барем во еден случај. Американската Комисија за хартии од вредност минатиот месец објави спогодба со Брајан Севел, основач на онлајн курс за тргување наречен Американска академија за биткоин, за кој регулаторот рече дека измамил 15 студенти за повеќе од  милион долари убедувајќи ги да инвестираат во лажен хеџ фонд. Севел не одговори на барањата за коментар.

Како што цената на биткоинот се искачи на рекордно ниво оваа година, имаше придружен скок во интересот за крипто од малопродажните и институционалните инвеститори - а со тоа и соодветен пораст на веб-пребарувањата за „крипто сертификација“, според „Гугл Трендс“ (Google Trends).

Запрашан за различните достапни сертификати, претставник на крипто-асоцијацијата „Коин Центар“(Coin Center) одговори дека не се запознаени со ниту еден од нив.

Некои големи работодавци во индустријата не обрнуваат многу внимание и на сертификатите.

„Бараме забележителни искуства и достигнувања во крипто просторот повеќе отколку сертификати“, рече портпаролот на „Коинбејс Глобал“ (Coinbase Global Inc.), најголемата американска криптоменувачница. „Ние исто така ја цениме страста и љубопитноста за крипто и развивме внатрешно образование за понатамошно развивање на луѓето“.

Сепак, некои работодавци наоѓаат вредност во одредени сертификати. „Битвајс Асет Менаџмент“ (Bitwise Asset Management) натера повеќе од 20 вработени да се стекнат со сертификацијата на Советот на финансиски професионалци за дигитални средства од 2021 година, како „одличен начин да се осигураат дека ќе започнат со силна основа за криптознаење“, рече Метју Хуган, главен инвестициски директор во „Битвајс“, која беше една од компаниите којашто лансираше нов биткоин ЕТФ.

Барањата за посета на курсевите за сертификација на Советот за финансиски професионалци за дигитални средства се зголемија за дури 30 проценти од почетокот на годината откако во СД беше одобрена првата група на ЕТФ-ови кои инвестираа директно во биткоин, информира Рик Еделман, основач на „Еделман Фајнаншел Енџинс“.

„Сега кога овие ЕТФ-ови се тука и има толку голема побарувачка од потрошувачите за нив, гледаме значителен пораст“, рече Еделман.

Тој додаде дека илјадници луѓе досега го поминале овој курс. Според него, овој курс се разликува од другите курсеви за сертификација не само затоа што зборува за блокчејн и крипто, туку и за разбирање на аспектите на финансиското планирање, оданочувањето и планирањето на криптоимотот.

За овој нов бран на потрошувачи кои влегуваат во криптосветот, предизвикот ќе биде како да се одвои плевелот од пченицата.

 

 

Во моментов нема коментари за веста. Биди прв да коментира...

Остави коментар