Обвинителите бараат 50 години затвор за криптоизмамникот Сем Банкмен-Фрид

Од американското обвинителство сметаат дека Сем Банкмен-Фрид треба да добие дури 50 години зад решетки за неговата улога во колапсот на неговата берза за криптовалути ФТХ (FTX) во „она што е веројатно најголемата измама во последната деценија“.

Казна која се движи од 40 до 50 години е неопходна за „историското“ злосторство на Банкмен-Фрид, кое вклучува повеќе од милион жртви и загуби од повеќе од 10 милијарди долари, соопштија обвинителите во петокот во судскиот поднесок. Барањето е многу помалку од 100-те години препорачани во американските упатства за висината на казните за криминал, но многу повеќе од шест и пол години што ги предложија неговите адвокати.

„Во секој дел од неговата работа и во однос на секое сторено кривично дело, обвинетиот демонстрираше дрско непочитување на владеењето на правото“, велат обвинителите во поднесокот. „Тој ги разбираше правилата, но одлучи дека тие не важат за него“.

Американскиот окружен судија Луис А. Каплан во Њујорк треба да му изрече казна на 32-годишникот на 28 март годинава. Со толку голема разлика во препораките, одлуката на судијата би можела да биде удар за другите директори во светот на криптовалутите кои измамиле инвеститори или лошо управувале со средствата на клиентите.

Поротата во Менхетен го осуди Банкмен-Фрид во ноември по седум обвиненија, меѓу кои и за финансиска измама и заговор. Обвинителите рекоа дека тој го насочил трансферот на пари од клиентите на „ФТХ“ во „Аламеда Рисрч“ (Alameda Research), поврзан хеџ фонд за ризични инвестиции, политички донации и скапи недвижности пред двете компании да пропаднат во 2022 година. Пред тоа, ФТХ беше проценет на 32 милијарди долари.

За време на судењето, неколку блиски колеги и пријатели на Банкмен-Фрид во ФТХ и „Аламеда“ сведочеа против него, некои со надеж дека ќе добијат поблаги казни за нивните признати злосторства.

Марк Ботник, портпарол на Банкмен-Фрид, рече дека неговите адвокати ќе поднесат одговор на владиниот поднесок следната недела.

Погубна мегаломанија

Обвинителите во петокот рекоа дека тој покажал „невидена алчност и дрскост“ и го прекршил законот заснован на „погубна мегаломанија водена од сопствените вредности и чувство на супериорност на обвинетиот“.

„Дури и сега Банкмен-Фрид одбива да признае дека тоа што го направил било погрешно“, рекоа обвинителите.

Кога станува збор за изрекувањето на казната, можеби нема да помогне тоа што Банкмен-Фрид понекогаш имаше несоодветен однос кон судијата.

Откако Банкмен-Фрид беше обвинет во декември 2022 година, Каплан му дозволи да остане во домашен притвор во домот на неговите родители во Пало Алто, Калифорнија, додека го чека судењето. Но, неколку месеци подоцна, беше откриено дека тој користел шифрирани апликации за пораки и ВПН програми, што се коси со условите за неговото ослободување.

Дневникот на Елисон

Судијата нареди да биде затворен во август, откако поранешниот криптомагнат во Њујорк тајмс објави делови од дневникот на Керолин Елисон, поранешна главна извршна директорка на „Аламеда Рисрч“ и поранешна девојка на Банкмен-Фрид. Елисон се изјасни за виновна за поврзани злосторства и соработуваше со обвинителите. Таа подоцна сведочеше против Банкмен-Фрид на судењето.

Во тоа време, Каплан го нарече „некој кој покажал подготвеност и желба да ризикува да ја премине границата во обид да стигне до целта, без разлика каде е линијата“.

При крајот на неговото едномесечно судење, Банкмен-Фрид сведочеше во своја одбрана и честопати изгледаше конфузно. Судијата често го прекинуваше за да го предупреди да одговори на поставените прашања. На поротниците им требаа помалку од пет часа за да го отфрлат неговото тврдење дека не бил свесен за погрешно постапување во ФТХ.

Банкмен-Фрид „повеќепати лажеше под заклетва“, рече владата во својата судска пријава. Ако Каплан утврди дека лежел додека сведочел, тоа може да резултира со построга казна.

Обвинителите тврдеа дека Банкмен-Фрид направил повеќе од 100 милиони долари во нелегални политички донации на повеќе од 300 политичари и политички групи - најголемото прекршување на законите за финансирање на кампањата досега. Тој потрошил дополнителни 150 милиони долари за да поткупи функционери на кинеската влада, што е исто така рекорд од поединец, велат тие.

Поднесокот на судот вклучува графикон на кој се прикажани 13 лица осудени за измами со загуби од 100 милиони долари или повеќе и се тврди дека повеќето добиле казни во опсег од 40 до 50 години. Бернард Медоф ја имаше највисоката казна, 150 години, за најголемата Понзи шема во историјата на САД. Медоф почина во затвор во 2021 година.

Измамата на Банкмен-Фрид треба да биде рангирана на второ место, по онаа на Медоф, која имаше загуби од 13 милијарди долари, според владата.

Минатиот месец во судска пријава, адвокатите на одбраната се залагаа за релативно блага казна, нарекувајќи го потенцијалот за 100-годишна казна „гротеска“ и „варварска“. Тие рекоа дека таа бројка се заснова на лажно мислење дека однесувањето на Банкмен-Фрид предизвикало загуба од 10 милијарди долари.

Банкмен-Фрид е затворен од август во Метрополитен притворниот центар во Бруклин. Судиите, адвокатите и поранешните затвореници остро ги критикуваа условите во МДЦ, каде што се наоѓаат лица обвинети за злосторства и кои чекаат судење.

Адвокатите на Банкмен-Фрид се пожалија дека тој нема пристап до лекови за неговата депресија и дека затворот нуди многу ограничени опции за храна за нивниот вегански клиент. Банкмен-Фрид изгубил значително од телесната тежина додека бил затворен.

Во моментов нема коментари за веста. Биди прв да коментира...

Остави коментар