.webp){kind=icon}
На крајот на 2021 година граѓаните располагале во просек со 1,9 трансакциски сметки по глава на жител. Притоа, сопствениците на сметките ги користат дигиталните услуги за пристап кај околу 43 проценти од сметките, додека пак електронски плаќања се извршуваат кај 17 проценти од сметките, покажуваат новите податоци на Народната банка.
Од аспект на возрасната структура, помладата популација на возраст до 34 години располага во просек со 1,7 сметки и се најголеми корисници на дигиталните канали за увид во сметките и за извршување на електронските плаќања.
„Имено, поголем дел од сметките во нивна сопственост, односно над 65 проценти им биле достапни за електронски увид, а 25 проценти за извршување на електронските плаќања. Граѓаните од возрасните групи од 35 до 64 години, на кои отпаѓаат по 2,5 сметки, што е над просекот по глава на жител, помалку ги користат дигиталните услуги и вршат електронски увид во своите сметки до 43 проценти и електронски плаќања преку 17 проценти од сметките“, информираат од Народната банка.
Граѓаните на возраст над 65 години најмалку ги користеле дигиталните канали за увид (само на 23 проценти од сметките) и електронско плаќање (околу 6 проценти) од сметките), иако им припаѓаат по 2,4 сметки, односно 0,5 сметки повеќе од просекот по глава на жител. Сепак, овие граѓани релативно поактивно ги користеле платежните картички за повлекување готовина, учествувајќи со 17,8 проценти во вкупниот број трансакции за повлекување готовина на банкомати во земјата.
„Генерално, во однос на минатата година се забележува поголема употреба на дигиталните услуги кај сите возрасни групи, што е причина за нагорно поместување на учеството и на сметките со електронски пристап и на сметките за електронски плаќања“, укажуваат од Народната банка.
Од аспект на родовата структура на сопствениците на сметките, податоците посочуваат на родов јаз од 0,6 сметки повеќе во корист на мажите (2,2 сметки по глава на жител од машки пол, наспроти 1,6 сметки по глава на жител од женски пол).
„Сепак, во споредба со мажите, во текот на 2021 година жените биле поактивни пристапувачи преку дигиталните канали кон своите сметки, правејќи најмалку еден увид во состојбата или промените, како и поактивни плаќачи, користејќи ги погодностите на интернет-банкарството или мобилните платежни апликации. Така, сметките коишто се во сопственост на жените и со можност за плаќање преку интернет-банкарство или мобилна платежна апликација биле искористени за таа намена 41,6 проценти, додека во истиот период мажите користеле 39,5 проценти од своите сметки за таа можност. Инаку, жените и мажите подеднакво направиле најмалку еден увид во состојбата и промените во неа кај 50 проценти од нивните сметки“, соопшти Народната банка.
Од аспект на инфраструктурната покриеност по општини за извршување на платежните трансакции, најголема покриеност со банкомати на десет илјади жители е забележана во Скопје (10), Дојран (10) и во Гевгелија (9), додека, пак, најголема покриеност со уреди на физички места на продажба е евидентирана во Скопје (566), Гевгелија (325) и во Охрид (299). Во рамките на Градот Скопје, најголема покриеност со банкомати и уреди на физички места на продажба имаат општините Центар, Аеродром и Карпош.
