„Тикток“ мора да ги следи новите правила на ЕУ или ќе добие забрана

Висок функционер од Европската унија го повика „Тикток“ (TikTok) да ги почитува најавените правила за содржина или ќе се соочи со можна забрана, што е остра промена на тонот од Брисел.

Еврокомесарот за внатрешен пазар, Тиери Бретон, рече дека е неприфатливо корисниците на платформата да можат да пристапат до штетна, а понекогаш дури и опасна по животот содржина, за само неколку секунди. Тој ја даде изјавата откако одржа видеоповик со извршниот директор на „Тикток“, Шоу Зи Чу во четвртокот.

„Со помладата публика доаѓа поголема одговорност. Нема да се двоумиме да го усвоиме целиот опсег на санкции за да ги заштитиме нашите граѓани доколку ревизиите не покажат целосна усогласеност“, напиша Бретон, изразувајќи загриженост дека некои вработени во кинеската компанија „Бајт денс“ (ByteDance) шпионираат новинари и дека компанијата пренесува лични податоци надвор од Европа.

Според Законот за дигитални услуги, со кој компаниите треба да се усогласат до 1 септември, големите интернет платформи ќе мора да се соочат со долг список на правила за умереност на содржината или ризикуваат казни до шест проценти од нивниот годишен приход, но и можна забрана во земјите на ЕУ.

Бретон му рекол на Шоу Зи дека „Тикток“ ќе биде меѓу првите цели на истражните комисии во рамки на ДСА (DSA), извести за „Блумберг“ неговиот помошник, додавајќи дека денеска, според предлог-законот, би била на сила забрана за „Тикток“ во ЕУ. Каролин Грир, портпаролка на „Тикток“, рече дека компанијата е посветена на почитување на ДСА и другите правила на ЕУ.

Претставниците на ЕУ претходно имаа многу пoтивок пристап кон „Тикток“ во споредба со американските законодавци. Сепак, повеќе политичари во Европа изразуваат загриженост за платформата, особено откако компанијата призна дека некои вработени пристапиле до податоци на новинари во обид да идентификуваат лица кои изнесуваат податоци за компанијата.

По разговорот со Шоу Зи, Бретон постави објава која се чини дека е слабо прикриена закана кон „Тикток“. Објавата не ја именуваше компанијата, но се споменуваат платформи, популарни меѓу младите, со заразни, вирални видеа, кои се „извалкани од скандали“. Бретон, исто така, направи споредби со „волк во овча кожа што покренува сериозни геополитички прашања“ за испраќање податоци надвор од Европа.

„Една од најголемите грижи е како податоците собрани од овие платформи може да се користат за политичка или економска добивка на други земји. Ова би можело да вклучува и употреба на податоци за насочено рекламирање или политичка манипулација, што може да има значително влијание врз политичкиот пејзаж на нашиот континент“, истакна Бретон.

Тој изјави и дека ЕУ нема произволно да забранува платформи. „ЕУ има јасни и силни регулативи кои платформите мора да ги следат. Но, за жал, не можеме да се потпреме само на добра волја. Некои од платформите играат особено важна улога во животот на нашите помлади сограѓани и затоа ќе водиме посебна грижа за тоа дали се придржуваат до сите релевантни прописи и ги почитуваат правата на своите корисници“, заклучи тој.

Во моментов нема коментари за веста. Биди прв да коментира...

Остави коментар