Стартапот за чипови „Ривос“ (Rivos) му се спротивстави на „Епл“ (Apple Inc.), тврдејќи дека технолошкиот гигант ги принудува вработените да потпишуваат рестриктивни договори кои ги спречуваат да работат на друго место и ги задушуваат новите компании кои вработуваат негов персонал.
Противтужба поднесена во петокот од „Ривос“ и шест поранешни вработени на „Епл“ во федералниот суд во Сан Хозе го ескалира жестокиот спор за деловна тајна кој започна кога „Епл“ минатата година го тужеше „Ривос“ и неговите поранешни вработени кои му се приклучија на стартапот. „Ривос“ возврати барајќи од судот да пресуди дека „прешироките“ обврски наметнати во договорите на „Епл“ се неприменливи.
Bloomberg
„Плашејќи се од каква било закана од легитимна конкуренција на пазарот и надевајќи се дека ќе ги заплаши и испрати пораката до сите вработени кои се осмелиле да ја напуштат компанијата и да работат на друго место, 'Епл' прибегна кон обид да ги спречи новите стартапи преку антиконкурентни мерки, вклучително и незаконски ограничувања на мобилноста на вработените“, посочи „Ривос“ во противтужбата.
Портпаролот на „Епл“ одби да коментира.
„Епл“ го обвини стартапот и вработените во тужба во која наведува дека неговите инженери биле намамени и украле комерцијални информации користени за развој на чипови. Спорот се врти околу технологијата „систем на чип“ која собира повеќе компјутерски елементи во мал чип, во која „Епл“ вели дека инвестирал милијарди долари со цел да ги направи своите уреди помоќни.
„Ривос“ тврди дека Договорот за интелектуална сопственост на „Епл“ што вработените го потпишуваат како услов за вработување е „експанзивен и опфаќа сè што е 'научено' за време на вработувањето, без разлика дали тоа е деловна тајна“. Договорот вклучува одредба „која е смислена и 'Епл' ја користи за да ја задуши мобилноста на вработените и конкуренцијата“, посочува „Ривос“ во својата противтужба.
Покрај тоа, „Епл“ им дозволува на вработените да складираат работни документи во нивните сметки на ајклауд (iCloud) и ајмесиџ (iMessage), но не ги проверува нивните податоци и пораки кога ќе заминат, според противтужбата на „Ривос“.
.webp){kind=icon}
Во моментов нема коментари за веста. Биди прв да коментира...