ЕУ му изрече на „Епл“ казна од 1,8 милијарда евра поради злоупотреби на Еп стор

„Епл“ (Apple Inc.) доби казна од 1,8 милијарда евра (2 милијарди долари) од Европската Унија поради истрагата за наводите дека на своите платформи ги саботирал конкурентските сервиси за стриминг музика, меѓу кои и Спотифај (Spotify).

Европската комисија исто така ѝ нареди на фирмата со седиште во Купертино, Калифорнија, да престане да ги попречува апликациите за стриминг музика во можноста да ги информираат корисниците на Еп стор (App Store) за поевтините зделки што ги нудат.

„'Епл' една деценија ја злоупотребуваше својата доминантна позиција на пазарот за дистрибуција на апликации за стриминг музика преку Еп стор“, рече шефицата на антимонополската комисија на ЕУ, Маргрет Вестагер. „Тие го правеа тоа со ограничување на програмерите да ги информираат потрошувачите за алтернативни, поевтини музички услуги достапни надвор од екосистемот на 'Епл'“.

„Епл“ се спротивстави на казната од ЕУ, преку соопштение во кое се наведува дека регулаторите не успеале да „откријат веродостојни докази за штетата кон потрошувачите и ја игнорираат реалноста на пазарот што просперира, конкурентен е и брзо расте“.

Компанијата објави приход од 119,6 милијарди долари во првиот квартал, вклучувајќи 69,7 милијарди долари само од ајфон, при што продажбата на уредот е зголемена за шест отсто од пред една година.

Шефицата за конкуренција на ЕУ, Маргрет Вестагер, ја направи главна стратегија целта да се анулира доминацијата на големите технолошки компании во блокот. Таа го казни „Гугл“ (Google) на „Алфабет“ (Alphabet Inc.) со парична казна од повеќе од 8 милијарди евра, а исто така му нареди на „Епл“ да врати 13 милијарди евра за наводно неоправдани даночни олеснувања од Ирска.

Нејзините регулатори сега се подготвуваат за спроведување на водечкиот Закон за дигитални пазари (Digital Markets Act) - кој треба да стапи во сила на 7 март. Сеопфатните нови правила имаат цел да ги спречат прекршувањата на конкуренцијата од страна на технолошките фирми пред да се вкоренат.

На компаниите ќе им биде забрането да ги комбинираат личните податоци во различни услуги на нивните платформи и да користат податоци што ги собираат од трговци од трети страни за да се натпреваруваат против нив. Тие исто така ќе треба да им овозможат на корисниците да преземаат апликации од ривалските платформи. 

Истрагата на ЕУ за Еп стор на „Епл“ беше поттикната од жалба пред речиси пет години од страна на „Спотифај“, од каде што тврдеа дека биле принудени да ја зголемат цената на своите месечни претплати за да ги покријат трошоците поврзани со наводното задушување од страна на „Епл“ на неговата Еп стор.

Во моментов нема коментари за веста. Биди прв да коментира...

Остави коментар