.webp){kind=icon}
„Епл“ (Apple Inc.) ќе се соочи со парична казна од Европската Унија од близу 500 милиони евра поради регулаторната истрага за наводите дека ги замолчил ривалите за стриминг на музика, вклучувајќи го и „Спотифај“ (Spotify Technology SA), на своите платформи.
Казната - прва за „Епл“ во рамките на Унијата - ќе биде изречена откако регулаторното тело на ЕУ утврди дека се прекршени правилата за конкуренција со спречување на конкурентските музички сервиси да ги информираат корисниците дека постојат поевтини алтернативи надвор од продавницата за апликации на „Епл“ (App Store), според луѓе запознаени со ова прашање.
Од „Епл“, кога беа контактирани за коментар, се повикаа на претходна изјава, во која се наведува дека „App Store му помогна на ’Спотифај’ да стане врвна услуга за стриминг на музика низ Европа“. Европската комисија одби да коментира. „Фајненшл тајмс“ исто така објави за казната.
Истрагата на ЕУ за App Store на „Епл“ беше поттикната од жалба пред речиси четири години од страна на „Спотифај“, од каде што тврдеа дека биле принудени да ја зголемат цената на своите месечни претплати за да ги покријат трошоците поврзани со наводното задушување од страна на „Епл“ на неговата App Store.
На состанок зад затворени врати меѓу претставниците на ЕУ и „Епл“ во јуни минатата година, технолошката компанија им посочила на регулаторите дека веќе ги решила сите можни поплаки за конкуренцијата што произлегуваат од жалбата на „Спотифај“.
Во посебна истрага, „Епл“ треба да го прифати предлогот за порамнување на ЕУ за неговата технологија за допирање и плаќање, според луѓе запознаени со ова прашање.
Комисијата е подготвена да ја прифати 10-годишната понуда од „Епл“ да го отвори пристапот до својот комуникациски чип на ајфоните за конкурентски дигитални паричници, откако тестот на пазарот доби главно позитивни повратни информации, велат упатени извори, кои побараа да останат анонимни бидејќи станува збор за приватни преговори.
Потегот на „Епл“ да го реши случајот дојде откако регулаторот на ЕУ претходно поттикна формална загриженост дека компанијата го ограничила пристапот до технологијата, што претставува наводна злоупотреба на нејзината пазарна моќ.
Шефицата за конкуренција на ЕУ, Маргрет Вестагер, ја направи главна стратегија целта да се анулира доминацијата на големите технолошки компании во блокот. Таа го казни „Гугл“ (Google) на „Алфабет“ (Alphabet Inc.) со парична казна од повеќе од 8 милијарди евра, а исто така му нареди на „Епл“ да врати 13 милијарди евра за наводно неоправдани даночни олеснувања од Ирска.
Нејзините регулатори сега се подготвуваат за спроведување на водечкиот Закон за дигитални пазари (Digital Markets Act) - кој треба да стапи во сила на 7 март. Сеопфатните нови правила имаат цел да ги спречат прекршувањата на конкуренцијата од страна на технолошките фирми пред да се вкоренат.
