ВИ ги намали за половина загубите од измами во најголемата австралиска банка

Австралиската „Комонвелт банк“ (Commonwealth Bank of Australia) соопшти дека алатките за генеративна вештачка интелигенција (ВИ) ги намалиле загубите на клиентите од измами за половина. Исто така тие помогнале да се скрати процесот за одобрување хипотеки само на 10 минути.

Технологијата помогна да се намалат измамите за 30 отсто, а нејзината примена за пораки со вештачка интелигенција го скрати времето на чекање на клиентите во центарот за повици за 40 отсто годинава, соопшти банката во четвртокот. Вештачката интелигенција наскоро ќе може да одговори на околу 10 отсто од најтешките прашања на клиентите што моментално не можат да се решат со редовни компјутерски одговори, изјави заемодавецот.

Воведувањето на вештачката интелигенција во најголемата банка во Австралија треба уште многу да се развива, бидејќи примената варира од итни проблеми до поширока организациска профитабилност. Измамите веќе беа во пад во Австралија бидејќи банките и технолошките компании вложија напори да ги обесхрабрат криминалците.

„Има повеќе од 50 случаи на употреба што веќе ги развивме и испорачавме, а не ги презентираме денес“, изјави извршниот директор Мет Комин во Сиднеј во четвртокот. „Голем дел од оваа година се обидувавме да размислиме кои се неколкуте навистина важни сегменти на употреба“.

„Комонвелт банк“ исто така ќе ја користи технологијата за пополнување на документите за тековните клиенти. Тоа може да го скрати времето на чекање за прелиминарно одобрување за станбени кредити само на 10 минути, а за годишните прегледи на малите бизниси од 14 часа на два, изјавија од банката.

Подобрената технологија исто така надгледува повеќе од 20 милиони плаќања што ги обработува „Комонвелт банк“ секој ден за да издаде околу 20.000 предупредувања за сомнителни трансакции дневно - бројка што наскоро ќе достигне 35.000.

Во моментов нема коментари за веста. Биди прв да коментира...

Остави коментар