Италијанската влада дава 1,5 милијарди евра за сателитските услуги на Маск

Италија е во напредна фаза на преговори со „Спејс екс“ на Илон Маск за договор за обезбедување на безбедни телекомуникациски услуги за потребите на владата, што би бил најголемиот таков проект во Европа, велат извори запознаени со состојбите.

Преговорите се во тек, а конечна спогодба за петгодишниот договор сè уште не е постигната, посочуваат упатените кои сакаа да останат анонимни поради доверливоста на преговорите. Проектот веќе е одобрен од италијанската разузнавачка служба, како и од тамошното министерство за одбрана, додадоа тие.

Изгледа дека преговорите, кои до неодамна беа во застој, напредуваа откако италијанската премиерка Џорџа Мелони го посети новоизбраниот претседател Доналд Трамп на Флорида во саботата.

Италијанските официјални лица преговараат за договор вреден 1,5 милијарди евра, кој е насочен кон снабдување на Италија со целосен спектар на високо ниво на енкрипција за телефонски и интернет услуги што ги користи владата, рекоа изворите.

Bloomberg

Планот исто така вклучува комуникациски услуги за италијанската војска во медитеранскиот регион, како и воведување на сателитски услуги за мобилни телефони во Италија за користење во итни случаи, како што се терористички напади или природни катастрофи, посочуваат тие.

Потенцијалниот договор е во фаза на разгледување од средината на 2023 година. Некои италијански официјални лица се противеле на него, загрижени дека услугите може да ја намалат улогата на локалните оператори.

Претставниците на италијанската влада и „Спејс екс“ не одговорија веднаш на барањата за коментар надвор од работното време.

Само во 2024 година, „Спејс екс“ на Маск се прошири на повеќе од 20 земји, од Гана до Аргентина, благодарение на својата сателитска интернет услуга Старлинк (Starlink). Сега покрива повеќе од четири милиони луѓе во повеќе од 100 земји и територии, воведувајќи широкопојасни услуги низ целиот свет, потиснувајќи ги традиционалните телекомуникациски оператори и надминувајќи ги поновите конкуренти како што се „Амазон“ (Amazon.com Inc.) и компании од земји како Кина.

Кон крајот на минатата година, најголемиот украински мобилен оператор „Киевстар“ (Kyivstar PJSC) потпиша договор со Старлинк за воведување на сателитска мобилна услуга, за да постави телекомуникациска инфраструктура надвор од дофатот на руските напади.

Прочитајте повеќе: „Старлинк“ на Маск од вселената ќе обезбеди мобилни услуги во Украина

„Спејс екс“ ја нуди својата Старлинк услуга за комерцијални примени, од интернет услуги за домаќинства до поморски транспорт и авиокомпании, а исто така развива производ наречен Старшилд (Starshield) за одбранбени и чувствителни намени.

Компанијата го освојува светскиот пазар на сателитски комуникации благодарение на силната комбинација на технолошки достигнувања и паметни деловни маневри, како и растечката политичка моќ на Маск.
 

Во моментов нема коментари за веста. Биди прв да коментира...

Остави коментар