Струјата во САД поскапа и за 180 отсто поради „седумте величествени“

Брзиот развој на податочните центри што се  поврзани со најголемата американска електроенергетска мрежа предизвика пораст на трошоците од 9,4 милијарди долари – трошок којшто, почнувајќи од овој месец, ќе го почувствуваат потрошувачите од Илиноис до Вашингтон на своите сметки.

Вкупните трошоци пораснаа за 180 отсто, при што зголемените енергетски потреби на податочните центри се главна причина за зголемениот јаз меѓу понудата и побарувачката и високите цени на пазарот за капацитет на „ПЏМ Интерконекшн“ (PJM Interconnection - најголемиот оператор на електроенергетска мрежа во САД -  се наведува во извештајот од вторникот на „Мониторинг Аналитикс“ (Monitoring Analytics), независниот надзорен орган на оваа мрежа.

Анализата на „ПЏМ“  покажува дека домаќинствата и компаниите практично го субвенционираат бумот на дата-центрите, зад кои стојат некои од најбогатите технолошки компании во светот. „Моменталната состојба не е резултат на органски раст на потрошувачката“, стои во извештајот на „Мониторинг Аналитикс“. „Речиси целосно е предизвикана од големи дополнителни оптоварувања поради податочните центри – и оние што веќе работат и оние што се во најава.“

Трошокот за обезбедување капацитет во електромрежата на источниот дел од САД скокна на рекордни 14,7 милијарди долари, а според проценките на надзорниот орган, би изнесувал околу пет милијарди долари ако не е реалната и предвидената потрошувачка од дата-центрите. Најголемите поскапувања се забележани во Вирџинија и Мериленд. Капацитетите биле доделени преку аукција, а трошоците ќе важат една година почнувајќи од овој месец. „ПЏМ“ не одговори веднаш на барањето од „Блумберг“ за коментар.

Бумот на податочните центри ја подига побарувачката за електрична енергија во мрежата на нивоа што не се видени веќе две децении. „ПЏМ“ прогнозира дека летната пик-потрошувачка на струја во следните 15 години може да порасне за 70 гигавати – на вкупно 220 гигавати. Тоа би било 32 проценти повеќе од досегашниот рекорд, постигнат во летото 2006 со околу 165,6 гигавати, и би ја надминало моменталната производна способност на мрежата, која изнесува 183 гигавати, предупредува операторот.

Извештајот на пазарниот надзорник најверојатно дополнително ќе ги заостри дискусиите на техничката конференција на Федералната комисија за енергетска регулатива (FERC), која започнува во среда. На дневен ред е прашањето дали пазарите со електрична енергија, кои се обликувани во времето на дерегулација пред повеќе од две децении, воопшто можат да овозможат толку брзи инвестиции, да го забрзаат воведувањето обновливи извори и истовремено да ја одржат енергијата достапна и сигурна за сите потрошувачи.

На годишниот состанок на „ПЏМ“ минатиот месец во Северна Вирџинија – регион кој важи за светска престолнина на дата-центрите – еден од поголемите развивачи на ваква инфраструктура призна дека трошоците во голема мера ги сносат крајните корисници. „Во минатото во голема мера користевме систем што беше предимензиониран,“ рече Брајан Џорџ, шеф за глобален развој на енергетски пазари и политики во „Гугл“, на панел-дискусија. „Сега на системот му наметнуваме значителни трошоци.“