„Тесла“ ќе постави станици за полнење камиони од Тексас до Калифорнија

„Тесла“ (Tesla Inc.) бара речиси 100 милиони долари од САД за изградба на девет електрични станици за полнење на електричните камиони по должината на маршрутата од јужната граница на Тексас до северна Калифорнија, според информациите на „Блумберг њуз“.

Bloomberg Mercury

Компанијата предложи секоја станица да биде опремена со осум полначи од 750 киловати за возилата „тесла семи“ (Tesla Semi) и четири полначи за камиони направени од нејзините конкуренти, се наведува во барањето испратено од директорите на компанијата до одделот за транспорт во Тексас помеѓу мај и почетокот на јули.
Доколку успее, тоа ќе биде прва ваква мрежа за полнење во САД. Тоа ќе овозможи електрифициран транспорт на долги релации од Тексас до Калифорнија, заедно со регионално транспортирање камиони во Тексас, Аризона и Калифорнија. САД во голема мера се потпираат на комерцијални камиони за транспорт на стоки, но во меѓувреме се борат да ги ограничат емисиите на стакленички гасови од транспортниот сектор. Директорите на „Тесла“ им рекле на претставниците на Тексас да се одвојат федерални грантови што ќе бидат исплатени како дел од новата голема двопартиска инфраструктурна програма создадена за модернизација на американските транзитни системи.
Претставник на Федералната администрација за автопатишта на американското министерство за транспорт, која ги надгледува грантовите, рече дека агенцијата „во моментов ги разгледува апликациите“. Се очекува да ги објави примателите „во текот на годинава“. Според информациите, компанијата „Тесла“ бара 97 милиони долари федерални пари, а нејзиниот удел да биде 24 милиони долари. Засега не е познато дали без поддршка на државата компанијата ќе се нафати да го продолжи проектот.

Bloomberg Mercury

Маршрутата долга околу 1.800 милји (2.896 километри) започнува во Ларедо, Тексас, што е на околу 240 милји (386 километри) од седиштето на „Тесла“ во Остин и 150 милји (241 километар) од локацијата на новата фабрика што ја гради во Нуево Леон, Мексико. Компанијата веќе е присутна на тој граничен премин. Во 2022 година „Тесла“ доби ексклузивна лента за да помогне во префрлањето делови од доставувачите во Мексико до нејзините фабрики во САД, по кои сега сè уште претежно поминуваат возила со мотори со согорување.

„Тесла“ првпат го претстави прототипот на својот електричен камион „семи“ во 2017 година, иако компанијата се бореше да го донесе на пазарот. Кон крајот на минатата година компанијата му испорача 15 камиони на „Пепси“ (PepsiCo Inc), но некои од возилата се расипаа, па компанијата најави повлекување во март. Во регулаторните документи, „Тесла“ сè уште вели дека „семи“ е во „пилот-производство“. На енергетската конференција во Остин во јуни, главниот извршен директор Илон Маск рече дека „тесла семи“ веројатно нема да се произведува во голем број до следната година. 

Во моментов нема коментари за веста. Биди прв да коментира...

Остави коментар