.webp){kind=icon}
Легендарниот дизајнер Џони Ајв и Сем Алтман од „Опен еј-ај“ (OpenAI) бараат ветеран од „Епл“ (Apple Inc.) да работи на нов хардверски проект за вештачка интелигенција (ВИ), чија цел е да создаде уреди со најсовремени можности.
Како дел од напорите, извршниот директор на „Епл“ во заминување, Тенг Тан, ќе ѝ се придружи на дизајнерската фирма на Ајв, „Лавфрoм“ (LoveFrom), која ќе ги обликува изгледот и карактеристиките на новите производи, според луѓе запознаени со ова прашање. Алтман, извршен директор што стана заштитно лице на модерната вештачка интелигенција, планира да обезбеди софтверска основа, посочуваат изворите, кои побараа да не бидат идентификувани бидејќи постапката не е јавна.
Процесот претставува еден од најамбициозните потези преземени од Ајв откако го напушти „Епл“ во 2019 година за да го создаде „Лавфрoм“. Култниот дизајнер е познат по производите за кои помогна да се осмислат под водство на соосновачот на „Епл“, Стив Џобс, вклучувајќи ги ајмек (iMac), ајфон (iPhone) и ајпед (iPad). Неговата надеж е дека од работата на уреди со вештачка интелигенција ќе произлезе нова компанија, но развојот на производите останува во рана фаза, велат изворите. Досегашните напори се насочени кон ангажирање таленти и креирање концепти.
Култниот дизајнер Џони Ајв регрутира уште еден ветеран на „Епл“, со кого ќе работи на уреди со вештачка интелигенција
Bloomberg
Тан ќе го води хардверското инженерство на проектот додека работи во „Лавфрoм“, велат изворите. „Блумберг њуз“ претходно објави дека извршниот директор се повлекува од функцијата потпретседател на „Епл“ за дизајн на ајфони и паметни часовници. Тој нема да замине до февруари, иако неговите обврски месецов се веќе намалени.
Алтман, кој беше отпуштен од функцијата главен извршен директор на „Опен еј-ај“ во ноември, но брзо направи камбек, вознемири некои членови на одборот со собирање средства за други потфати. Тоа ги вклучувало и идеите со Ајв, објави „Блумберг њуз“ во ноември. Алтман му се додворуваше на претседателот на „Софтбанк“ (SoftBank Group Corp.), Масајоши Сон, за инвестирање повеќе милијарди долари во новата компанија.
Проектите во оваа концептна фаза вклучуваат уреди наменети за домот. „Опен еј-ај“ ги пренасочи прашањата до „Лавфром“, од каде што одбија да коментираат. „Епл“ исто така одби да коментира.
За „Епл“, заминувањето на Тан го нагласува егзодусот на дизајнерски таленти. Од 2019 година, околу 14 члена на поранешниот тим на Ајв си заминаа од „Епл“. Во компанијата сè уште се само околу шест дизајнери што некогаш работеле под водство на Ајв.
Претходно годинава „Епл“ го загуби наследникот на Ајв, Еванс Хенки, по само неколку години на неговата позиција. Одливот на мозоци ја остави компанијата без очигледна замена за неа. Наместо да именува нов извршен директор што ќе го води дизајнот, „Епл“ го назначи Џеф Вилијамс, главниот оперативен директор, за директно да ги надгледува дизајнерите на компанијата.
Во меѓувреме, „Лавфром“ состави список на клиенти од висок профил, вклучувајќи ги „Ер-би-ен-би“ (Airbnb Inc.), „Ферари“ (Ferrari NV) и „Монклер“ (Moncler SpA). Фирмата исто така имаше тригодишен договор со „Епл“ за да продолжи да обезбедува консултантски услуги, но тој однос заврши во 2022 година. Севкупно, повеќе од 20 поранешни вработени на „Епл“ ѝ се приклучија на дизајнерската фирма.
Заминувањата од „Епл“ неодамна продолжија. Патрик Кофман, еден од најважните лидери во дизајнот на корисничкиот интерфејс на „Епл“, си замина. Колин Барнс, поранешен директор за дизајн во „Бритиш броудкастинг“ (British Broadcasting Corp), кој му се придружи на „Епл“ откако Ајв се повлече, заминува во јануари. Тој раководи со тимот за архитектура на интеракција, кој е одговорен за истражување на раните концепти за хардвер и за софтвер.
Шота Аојаги, уште еден член на познатиот тим за индустриски дизајн на Ајв во „Епл“, исто така напушти. Тој само што започна со работа во „Лавфром“.
