Загрепската компанија „Браварија Иваниќ“ ја произведе првата автономна мобилна соларна станица за полнење на електрични возила (ЕВ) во Европската унија (ЕУ), а „Блумберг Адрија“ присуствуваше на ексклузивна презентација за партнери и инвеститори.
Во медиумите често се слуша дека лошата инфраструктура и недоволниот број станици за полнење го попречуваат преминот кон електрични возила. Така, „Ројтерс“ неодамна напиша дека речиси половина од 1.600 станици за полнење на е-возила на „Репсол“ (Repsol) во Шпанија не работат бидејќи немаат приклучок за струја. Вакви недостатоци има и во цела ЕУ, но иновацијата што ја осмисли хрватската компанија би можела барем донекаде да ги надмине овие проблеми.
Имено, „Солтик“ (SoltiQ) е првата автономна мобилна соларна станица за полнење на електрични возила, која е со големина на едно паркинг место. Тврдат дека во него може да се паркира најголемиот електричен автомобил на пазарот, а може да се постави секаде. Подлогата може да биде бетон, чакал или земја, но со добра дренажа за станицата да не пропадне во земја.
Исто така, погодна е за сите временски услови и може да издржи ветрови до 150 километри на час. Ако во неа нема паркиран автомобил, таа сама се склопува. Дополнително, иновацијата е модуларна, што значи дека е можно да се поврзат неколку парчиња во една целина, а со тоа да се добие поголем капацитет на батеријата и поголема брзина на полнење од соларниот систем.
Јурај Пабаљ/Soltiq
Она што ја прави посебна оваа станица за полнење е тоа што на нејзиниот покрив има соларни панели кои собираат сончева енергија што ја користат за полнење на автомобилите, но автомобилите може да се полнат и со помош на батерија. „Солтик“ може да наполни 50 проценти од батеријата на просечно електрично возило или 25 електрични велосипеди или 10 електрични скутери за три до четири часа.
Колку беше важно „Браварија Иваниќ“ да се појави пред инвеститорите, говори и фактот што употребата на нивната станица на партнерите и потенцијалните инвеститори им ја демонстрираше хрватскиот возач Јурај Шабаљ, кој неодамна учествуваше на релито Дакар.
Судејќи по реакциите на насобраните, не би требало да има проблеми со продажбата и инвестициите. Тој влезе во салата со електричен автомобил придружуван со музика од виолина и импресивни светлосни ефекти, а во собата речиси и да немаше човек кој не го овековечи моментот со паметен телефон. Дополнителна доза на драма даде вештачката магла која околу самата станица за полнење. Сепак, судејќи по презентираното, проектот е се освен продавање магла.
Станиците го заинтригираа и ко-основачот на компанијата „Футура Партнерс“ (Futura Partners), претприемачот и инвеститор Саша Цветојевиќ, кој исто така беше меѓу присутните на презентацијата.
„Станица за полнење од овој тип е дефинитивно новина, бидејќи во неа се интегрирани неколку концепти кои досега не биле поврзани. Верувам дека производителот се‘ уште не е целосно запознаен со сите можни случаи во кои на потенцијалните клиенти ќе им треба ова или слично решение. Претстојниот почеток на продажбата сигурно ќе одговори на некои прашања околу пазарните нишки или модификации според барањата на клиентите. Производот ми е интересен, но морам да ги почекам конечните цени и можеби да направам неколку тестови“, ни рече Цветојевиќ.
Саша Цветојевиќ/Soltiq
„Се работи за 100 проценти хрватски изум. Имавме свој тим за развој и стратешки партнери, сè беше направено внатре“, вели Томислав Иваниќ, сопственик на компанијата „Браварија Иваниќ“, кој му се придружи на Шабаљ на сцената.
Како што рече Иваниќ, од идејата до реализација поминале само шест месеци. Тој признава дека неколку станици за полнење завршиле на купот отпад бидејќи не ги исполнувале поставените критериуми. За среќа, тие се изградени од материјали за рециклирање, во согласност со нивната приказна за одржливост.
Имено, објектот на „Браварија Иваниќ“ од 10.000 квадрати е без емисија на штетни материи, има 300 киловати соларни панели на покривот, а целата хала се напојува со соларна енергија. Станиците се произведуваат со нула проценти емисија на CO₂, а по работниот век, кој трае приближно 20 години, „Браварија Иваниќ“ ги рециклира.
„Продажбата на првите станици за полнење е веќе започната, а првите муштерии доаѓаат од Италија и Грција“, рече Иваниќ, кој се надева дека ова лето ќе започне сериското производство.
Бидејќи станицата за полнење е на пазарот само десет дена, „Браварија Иваниќ“ е презадоволна од покажаниот интерес. Барања, велат тие, веќе пристигнуваат од бројни земји, најмногу од Норвешка, Данска и Шведска.
Една станица за полнење чини меѓу 20.000 и 30.000 евра, а следните чекори за компанијата се воспоставување на продажна мрежа.
Инаку, „Браварија Иваниќ“ во 2022 година остварил вкупен приход од 2,46 милиони евра, што е зголемување за 85,45 проценти во однос на претходната година. Од друга страна, деловниот субјект во 2022 година остварил нето добивка од 9.278 евра, што е намалување за 60,15 проценти во однос на претходната година. ЕБИТДА во 2022 година изнесува 206.894 евра, а во областа на дејноста 3,74 милијарди евра.
„Можеме да произведуваме помеѓу 200 и 300 станици за полнење годишно. Со добри стратешки партнери можеби ќе успееме да произведеме повеќе“, рече Иваниќ, кој се надева дека во публиката ќе се најдат некои идни инвеститори.
„Проектот е реализиран со милион евра сопствени пари, односно средства од „Браварија Иваниќ“. Кога станува збор за долгорочната финансиска одржливост на проектот, веќе гледаме поврат на инвестицијата. Веќе продадовме повеќе од 15 станици“, изјави Иваниќ за „Блумберг Адрија“ и откри дека моментално работат на нов, посилен прототип на станицата за полнење, кој исто така се надеваат дека наскоро ќе го претстават.
.webp){kind=icon}
