Илон Маск бара пари за да му парира на „Опен еј-ај“

Новиот стартап за вештачка интелигенција (ВИ) на Илон Маск, „Екс еј-ај“ (X.AI Corp.), сака да собере од 3 до 4 милијарди долари во зделка со која компанијата ќе се процени на 18 милијарди долари, според материјалите испратени до инвеститорите.

Електронската порака за потенцијалното финансирање, на околу 20 страници, циркулира меѓу инвестициската заедница на Силициумската Долина, тврди извор што го добил документот. Луѓе блиски до Маск имале разговори во нивните сопствени кругови за да го проценат интересот за учество во договорот, рече лице што побара да остане анонимно бидејќи станува збор за приватни информации.

Повикот за вложување ги истакнува потенцијалните продажни точки за инвеститорите - ги промовира перформансите на Маск во „Тесла“ (Tesla Inc.) и „Спејс екс“ (Space Exploration Technologies Corp.), и нагласува дека „Екс еј-ај“ ќе може да се обучува од висококвалитетните податоци од социјалната мрежа X. Пристапот до податоците е од клучно значење за градење големи јазични модели, технологија што стои зад четботовите со вештачка интелигенција, област каде што „Екс еј-ај“ има цел да се натпреварува со други добро финансирани бизниси како што е оној на „Опен еј-ај“ (OpenAI).

Претставник за „Екс еј-ај“ не одговори на барањето за коментар.

Во моментов нема коментари за веста. Биди прв да коментира...

Остави коментар