Алтман на Блискиот Исток преговара за глобална соработка за вештачка интелигенција

Главниот извршен директор на „Опен еј-ај“ (OpenAI), Сем Алтман, работи на изградба на глобална коалиција меѓу владините и индустриските лидери за зајакнување на снабдувањето со чипови, енергија и капацитет на центрите за податоци потребни за развој на технологијата за вештачка интелигенција (ВИ), велат повеќе лица запознаени со состојбите.

Алтман неделава се состана со инвеститори и владини претставници во Обединетите Арапски Емирати (ОАЕ) за да разговараат за тоа како приватниот сектор може да работи со државите за поддршка на скапа, голема инфраструктура за вештачка интелигенција, посочуваат изворите, кои побарале анонимност бидејќи станува збор за приватни дискусии. Алтман исто така разговарал со официјални лица во голем број западни земји и ќе одржи состаноци во Вашингтон подоцна оваа недела, рече еден од изворите. Сè уште не е јасно во каква форма ќе бидат овие иницијативи.

Состаноците, за кои претходно немаше најави, го означуваат последниот обид на Алтман да одговори на загриженоста дека снабдувањето со чипови и друга клучна инфраструктура нема да може да држи чекор со брзиот напредок на вештачката интелигенција. Алтман работи на собирање милијарди долари од глобалните инвеститори за потфат со чипови, со цел да ги искористи средствата за формирање мрежа на фабрики за производство на полупроводници, објави „Блумберг“.

Преговорите на Алтман со официјални лица низ светот претставуваат поголем ангажман отколку што беше познато претходно. Тековните дискусии на извршниот директор исто така одат подалеку од производство на чипови и вклучуваат други ресурси, како енергија и капацитет на центрите за податоци, велат неколку луѓе запознаени со дискусиите.

„Како што беше претходно објавено, 'Опен еј-ај' води тековни разговори за зголемување на глобалната инфраструктура и синџирите за снабдување со чипови, енергија и центри за податоци“, рече портпаролот на компанијата. „Со нетрпение очекуваме да споделиме повеќе детали подоцна“.

Производителот на ЧетГПТ (ChatGPT ) ја смета потребата од огромни количества енергија за напојување на системите со вештачка интелигенција како еден од најголемите инфраструктурни предизвици со кои се соочува технолошката индустрија, според лице запознаено со ставовите на компанијата. Алтман претходно зборуваше за потребата од енергетски пробив за поддршка на технологијата, која е неверојатно „жедна“ за енергија, и сугерираше дека поевтината соларна енергија или нуклеарната фузија би можеле да го поттикнат развојот на вештачката интелигенција.

Додека беше во ОАЕ неделава, Алтман се состана со Мартина Стронг, американската амбасадорка во земјата, рече едно лице. (Претставник на Стронг одби да коментира.) Алтман исто така ќе отпатува за Вашингтон в четврток, според изворот, за да има состаноци на Капитол Хил и со членовите на американската национална безбедност и разузнавачката заедница. Состаноците се дел од тековните дискусии за тоа како САД и нивните сојузници можат да продолжат да водат во сферата на вештачката интелигенција и да обезбедат пристап до инфраструктура за оваа технологија.

Алтман претходно посочи дека верува дека е од суштинско значење да се соработува со американската влада за периодот и структурата за потфатот со чипови во вредност од повеќе милијарди долари, објави „Блумберг“. Како дел од тие напори, тој се сретна и со секретарката за трговија Џина Раимондо.