„Епл“ преговара со „Гугл“ за да ја користи неговата технологија за ВИ во ајфоните

„Епл“ (Apple Inc.) е во преговори да го вгради енџинот за вештачка интелигенција од Гемини (Gemini) на „Гугл“ (Google) во своите ајфони, според лица запознаени со ситуацијата, што би ја поставило основата за блокбастер договор што ќе ја стресе индустријата за вештачка интелигенција (ВИ).

Двете компании се во активни преговори што ќе му дозволат на „Епл“ да гo лиценцира Гемини, со сет на модели за генеративна вештачка интелигенција на „Гугл“, за да напојува некои нови функции што годинава доаѓаат во софтверот на ајфон, велат лицата, кои побараа да останат анонимни бидејќи станува збор за приватни заклучоци. „Епл“ исто така неодамна разговарал со „Опен еј-ај“ (OpenAI) бидејќи имал намера да го користи неговиот модел, посочуваат изворите.

Доколку договорот меѓу „Епл“ и „Гугл“ се реализира, тој ќе се заснова на партнерството за пребарување на двете компании. Со години, „Гугл“ на „Алфабет“ (Alphabet Inc.) му плаќа на „Епл“ милијарди долари годишно за да го прави неговиот пребарувач стандардна опција во веб-прелистувачот Сафари (Safari) на ајфон и на другите уреди. Двете страни не одлучиле за условите или брендирањето во договорот за вештачка интелигенција односно не финализирале како истиот тој ќе се спроведе, велат изворите.

Договорот ќе му даде на Гемини клучна предност, со милијарди потенцијални корисници. Но, тоа исто така може да биде знак дека „Епл“ не е толку далеку во однос на напорите во полето за вештачка интелигенција како што некои можеби се надеваа - и се заканува да привлече дополнителна антимонополска контрола за двете компании.

„Епл“ подготвува нови опции и можности како дел од iOS 18 - следната верзија на оперативниот систем за ајфоните - врз основа на сопствени модели за вештачка интелигенција. Но тие подобрувања ќе бидат фокусирани на функциите што работат на неговите уреди наместо на оние што се испорачуваат преку облак. Затоа, „Епл“ бара партнер околу тешката работа во однос на генеративната вештачка интелигенција, вклучувајќи функции за создавање слики и пишување есеи врз основа на едноставни упатства.

Портпаролите на „Епл“ и на „Гугл“ одбија да коментираат, а и од „Опен еј-ај“ не одговорија веднаш на барањето за коментар.

Од почетокот на минатата година „Епл“ го тестира својот голем јазичен модел (LLM) - технологија што е мотор на генеративната вештачка интелигенција - со кодно име Ajax. Некои вработени исто така тестирале базичен четбот наречен Епл ГПТ (Apple GPT). Но технологијата на „Епл“ останува инфериорна во однос на алатките од „Гугл“ и другите ривали, посочуваат изворите, што ѝ дава предност на опцијата за партнерство.

Договорот со „Епл“ ќе биде партнерство од највисок профил на „Гугл“ за Гемини досега и може да донесе голем благодат за напорите на компанијата во сферата на вештачката интелигенција. „Епл“ има повеќе од две милијарди уреди во активна употреба што потенцијално би можеле да станат дом на Гугл Гемини во текот на годинава. Во јануари „Самсунг“ (Samsung Electronics Co.) промовираше нови паметни телефони со карактеристики на вештачка интелигенција напојувани од Гемини.

Но партнерството меѓу двата гиганта од Силициумската Долина најверојатно ќе ги привлече очите на регулаторите. Тековниот договор на „Гугл“ со „Епл“ за пребарување веќе е во фокусот на тужбата на американското Министерство за правда. Владата тврди дека компаниите работеле како единствен ентитет за да го заобиколат пазарот за пребарување на мобилни уреди. Двојката го оправда аранжманот велејќи дека „Епл“ верува дека квалитетот на пребарувањето на „Гугл“ е супериорен во однос на ривалите и дека на ајфоните е лесно да се заменат провајдерите.